Dla žurnalista Paŭła Padabieda prakuratura zapatrabavała 4 hady kałonii
Dla vyśviatleńnia akaličnaściaŭ kryminalnaj spravy zapatrabavałasia ŭsiaho dva pasiadžeńni.
Pavieł Padabied. Fota z sajta BAŽ
Jak stała viadoma Biełaruskaj asacyjacyi žurnalistaŭ, padčas sprečak bakoŭ u Minskim haradskim sudzie 30 červienia abvinavačvańnie paprasiła pakarać videaapieratara 4 hadami kałonii ahulnaha režymu.
Praces u Minharsudzie pad kiraŭnictvam Jaŭhiena Pisareviča pačaŭsia 28 červienia, a ŭžo praź dzień pradstaŭnik prakuratury zapatrabavaŭ dla fihuranta realny termin źniavoleńnia — 4 hady papraŭčaj kałonii na padstavie č. 3 art. 361-1 KK.
Padčas pieršaha pasiadžeńnia stała viadoma, što Paŭłu Padabiedu inkryminujecca supraca z telekanałam «Biełsat» i, jak vynik, «udzieł u ekstremisckim farmavańni». U jakaści piersanalnaj datyčnaści demanstravalisia videasiužety «pratesnaha kantentu», u tym liku pryśviečanyja źnikłamu videaapierataru Dźmitryju Zavadskamu i zabitamu žurnalistu Paŭłu Šaramietu. Choć proźvišča fihuranta ŭ citrach nie značyłasia, pavodle «ŭskosnych prykmiet» było ahučanaje padazreńnie ŭ jaho niepasrednaj datyčnaści da zdymkaŭ.
Akramia taho, u chodzie pracesu stała zrazumieła, što telefon Paŭła Padabieda prasłuchoŭvaŭsia, hetaksama siłaviki mieli dostup da jahonaha listavańnia ŭ miesiendžarach.
Taksama žurnalista abvinavacili ŭ «karyślivych matyvach» ad žurnalisckaj dziejnaści i atrymańni finansavaj vyhady: padstavaj stała najaŭnaść kartki zamiežnaha banka. Nie vyklučana, što na hetaj padstavie padčas vyniasieńnia prysudu jamu dadatkova vypišuć štraf za patencyjna niaspłočanyja padatki ŭ Biełarusi.
Sam Pavieł Padabied inkryminavanyja «złačynstvy» ličyć całkam nadumanymi.