«Zahadvaŭ lehčy na ziamlu tvaram uniz i pić vadu z łužyny». U Kijevie biełaruski dobraachvotnik atrymaŭ umoŭny termin
Jon źbirajecca viarnucca na front.
Juryj Biełavusaŭ (sprava) z pabracimam
Sud pryznaŭ Juryja Biełavusava vinavatym u katavańni čałavieka i pryznačyŭ jamu pakarańnie ŭ vyhladzie 5 hadoŭ pazbaŭleńnia voli z vyprabavalnym terminam na 3 hady. Pa jašče dvuch abvinavačańniach sud zakryŭ spravy, jak piša «Radyjo Svaboda».
Hramadzianin Biełarusi Jury Biełavusaŭ sa žniŭnia 2022 hodu słužyŭ pa kantrakcie va Uzbrojenych siłach Ukrainy i ŭdzielničaŭ u bajach za vyzvaleńnie ad rasiejcaŭ paŭdniovych terytoryj krainy, ale jaho zatrymali praz abvinavačańnie ŭ vykradańni čałavieka, jaho katavańni i pahrozie zabojstvam. Jon pryznaŭ svaju vinu i pajšoŭ na pahadnieńnie sa śledstvam.
Sud pryznaŭ jaho vinavatym u katavańni (č. 2 art. 127 Kryminalnaha kodeksa Ukrainy) i pryznačyŭ jamu pakarańnie ŭ vyhladzie 5 hadoŭ pazbaŭleńnia voli z vyprabavalnym terminam na try hady.
Pa inšych abvinavačańniach — niezakonnaje pazbaŭleńnie voli i vykradańnie čałavieka (č. 2 art. 146 Kryminalnaha kodeksa Ukrainy) i pahroza zabojstvam (č. 1 art. 129) — sud vyzvaliŭ ad kryminalnaj adkaznaści ŭ suviazi z zaviaršeńniem terminaŭ daŭnaści złačynstva i zakryŭ spravy.
Sud pastanaviŭ, što ŭ pieryjad vyprabavalnaha terminu nahlad za Juryjem Biełavusavym budzie ažyćciaŭlać kamandzir vajskovaj častki, u jakoj jon słužyć, a ŭ vypadku spynieńnia słužby — upaŭnavažany orhan u pytańniach prabacyi.
Sud abaviazaŭ hramadzianina Biełarusi kampiensavać košt usich ekśpiertyz, jakija pravodzilisia ŭ spravie, u pamiery 21 574 hryŭniaŭ (kala 600 dalaraŭ ZŠA ŭ ekvivalencie. — RS).
Svajo rašeńnie sud abhruntavaŭ tym, što Jury Biełavusaŭ pajšoŭ na damovu ab pryznańni svajoj viny: biez ahavorak pryznaŭ siabie vinavatym pa ŭsich troch artykułach pry abstavinach, vykładzienych u abvinavaŭčym akcie, pahadziŭsia z pravilnaściu kvalifikacyi jahonych dziejańniaŭ, «ščyra raskajaŭsia i paprasiŭ prabačeńnia ŭ paciarpiełaha».
«Pryčynu ŭčynieńnia hetych kryminalnych pravaparušeńniaŭ jon patłumačyŭ «instynktam statku», žadańniem stać «častkaj čahości važnaha», upłyvam kampanii. Jon adznačyŭ, što pradmietam, padobnym da pistaleta, jakim jon u toj dzień pahražaŭ paciarpiełamu, byŭ startavy pistalet», — adznačajecca ŭ rašeńni suda.
Jury Biełavusaŭ taksama patłumačyŭ, što na pačatku sudovaha razhladu nie pryznavaŭ svajoj viny, «bo nie viedaŭ, jak treba, nie razumieŭ».
Paciarpieły pahadziŭsia z takim vyrakam suda i źniaŭ svaje pretenzii. Jon paviedamiŭ u sudzie, što Jury Biełavusaŭ užo vypłaciŭ jamu 90 tysiač hryŭniaŭ kampiensacyi i paabiacaŭ jašče 10 tysiač hryŭniaŭ. Ahułam — 100 tysiač hryŭniaŭ (krychu mienš za 3000 dalaraŭ u ekvivalencie. — RS).
Što papiaredničała
Biełarusa zatrymali 18 kastryčnika 2022 hoda. Padstavaj stała toje, što jon nie zjaŭlaŭsia na pasiadžeńni suda. Na sudovym pasiadžeńni advakat Juryja Biełavusava zajaviŭ, što toj nie moh samavolna pakinuć terytoryju vajskovaj častki, kab pryjechać na sudovy razhlad spravy. Ale sud nie ŭličyŭ hetych abstavin.
Jašče adzin fihurant hetaj spravy — Jury Ijonaŭ, bajec bataljona «Azoŭ» 2014 hoda. Ale jon zahinuŭ u 2022 hodzie pry abaronie Maryupala. U rozny čas Jury Ijonaŭ byŭ aktyvistam šerahu hramadskich arhanizacyj, jakija stvaryŭ jašče adzin viadomy azoviec, Siarhiej Karotkich, jaki da atrymańnia ŭkrainskaha pašparta byŭ hramadzianinam Biełarusi.
Śledčyja vyśvietlili, što ŭ śniežni 2017 hoda Jury Biełavusaŭ i Jury Ijonaŭ jechali na aŭtamabili BMW pa Kijevie i, prajazdžajučy pa adnoj z centralnych vulic, vyjechali na piešachodnuju zonu. Adzin ź minakoŭ zrabiŭ im zaŭvahu. U adkaz jany zapchali taho ŭ aŭtamabil na zadniaje siadzieńnie.
Jak udakładniŭ na adnym z sudovych pasiadžeńniaŭ prakuror, Jury Biełavusaŭ pahražaŭ paciarpiełamu pradmietam, padobnym da pistaleta, zahadvaŭ tamu «lehčy na ziamlu tvaram uniz i pić vadu z łužyny», a hetyja dziejańni supravadžaŭ «bićciom i inšymi hvałtoŭnymi dziejańniami».
Pieršapačatkova Juryja Biełavusava zatrymali 28 maja 2020 hoda. Jon znachodziŭsia pad vartaj da 8 vieraśnia 2020 hoda — da taho momantu, kali sud źmianiŭ mieru papiaredniaha strymańnia na alternatyŭnuju, uniasieńnie hrašovaha zakładu ŭ pamiery 42 040 hryŭniaŭ (na toj momant kala 1,5 tysiačy dalaraŭ u ekvivalencie. — RS).
Ad žniŭnia 2022-ha Jury Biełavusaŭ słužyŭ strałkom u adnoj z vajskovych častak Uzbrojenych sił Ukrainy. Jahonyja kamandziry źviartalisia ŭ sud z chadajnictvam ab uziaćci biełarusa na paruki, ale sud u hetym admoviŭ.