U Viciebsku zatrymali kazačaha atamana. Jon značny deviełapier, KDK maje da jaho pretenzii
Bujnoha viciebskaha deviełapiera zatrymali praz padazreńnie va ŭchileńni ad vypłaty padatkaŭ, paviedamlaje pres-słužba Kamiteta dziaržkantrolu. KDK niedaličyŭsia ad jaho 2,5 młn rubloŭ padatkaŭ. «Naša Niva» miarkuje, što havorka idzie pra viciebskaha biznesmiena Vasila Ramanienku. Jon taksama byŭ atamanam Viciebskaj akruhi.
Jak paviedamlaje KDK, padazravany vosiem hadoŭ zajmaŭsia arendaj kamiercyjnaj nieruchomaści. Va ŭłasnaści jaho siamji znachodzicca bolš za 65 abjektaŭ, u tym liku bujny handlovy centr, adzin z rynkaŭ horada, składskija pamiaškańni.
Pavodle KDK, z metaj uchileńnia ad padatkaŭ «hałava siamiejstva, zarehistravany ŭ jakaści indyvidualnaha pradprymalnika, arhanizavaŭ rehistracyju jašče šaści ŭzajemazaležnych i padkantrolnych subjektaŭ haspadarańnia, jakija zajmalisia tym samym vidam dziejnaści, pry hetym vykarystoŭvali śpiecyjalny režym padatkaabkładańnia».
KDK miarkuje, što pamiž hetymi subjektami haspadarańnia biznesoviec štučna raźmierkavaŭ handlovyja abjekty i vyručku ad ich zdačy ŭ arendu.
Pieratrusy ŭ ofisach Ramanienki. Fota: KDK
«Finansavaj milicyjaj byŭ vyśvietleny ceły šerah prykmiet, jakija pakazvajuć na najaŭnaść supraćpraŭnaj schiemy minimizacyi padatkaŭ: kampanii viali supolny biznes, kiravańnie ich dziejnaściu faktyčna ažyćciaŭlałasia adnoj asobaj, ofisnyja pamiaškańni ŭsich subjektaŭ haspadarańnia znachodzilisia na adnym jurydyčnym adrasie dy inšaje», — paviedamlaje viedamstva.
Pa viersii KDK, u vyniku nieabhruntavanaha vykarystańnia lhotnaha režymu padatkaabkładańnia biznesoviec uchiliŭsia ad vypłaty padatkaŭ na ahulnuju sumu nie mienšuju za 2,5 młn rubloŭ.
U dačynieńni da jaho i jašče čatyroch čałaviek raspačataja kryminalnaja sprava.
Praviedzienyja vosiem pieratrusaŭ, aryštavanyja 65 abjektaŭ nieruchomaści ahulnym koštam kala 100 młn rubloŭ.
«U ciapierašni čas padazravanyja pa kryminalnaj spravie dajuć pryznalnyja pakazańni. Prymajucca miery pa kampiensacyi naniesienaj škody. U dobraachvotnym paradku imi pieraličana ŭ biudžet 330 tysiač rubloŭ», — dadali ŭ KDK.
Infarmacyju pra zatrymańnie Ramanienki źjavilisia ŭ sietkach 27 žniŭnia. Napeŭna, Ramanienka ciapier na voli, ale dakładnaj infarmacyi na hety kont niama.
Jaho siamja vałodaje rynkam «Centralny», budaŭničaj kramaj «RamHandal», byłym kinateatram «Bryhancina» i h. d.
Ramanienku 71 hod. Jon skončyŭ Akademiju sielskaj haspadarki ŭ horadzie Horki ŭ 1984 hodzie, pracavaŭ u kiroŭnych orhanach sielskaj haspadarki. «Naładziŭ u horadzie pastaŭki praduktaŭ charčavańnia dla nasielnictva», jak piša pra jaho sajt «Biełaruskaje kazactva».
Cikavaść da jaho hetaha sajta nie vypadkovaja. Ën byŭ hałoŭnym atamanam Viciebskaj akruhi hetaj struktury z rasijskimi karaniami.