Blinkien papiaredziŭ kanhresmienaŭ pra ryzyku ŭvarvańnia Azierbajdžana ŭ paŭdniovuju Armieniju — Politico
Jany abmiarkoŭvali miery, jakija mohuć pryniać ZŠA ŭ adkaz na toje, što Azierbajdžan uziaŭ pad svoj kantrol terytoryju Nahornaha Karabacha.
Dziaržaŭny sakratar ZŠA Entani Blinkien papiaredziŭ kanhresmienaŭ, što vojski Azierbajdžana ŭ nastupnyja tydni mohuć uvarvacca na poŭdzień Armienii, paviedamlaje Politico sa spasyłkaj na krynicy. Materyjał pierakazvaje «Mieduza».
Pa słovach krynic, Blinkien 3 kastryčnika abmiarkoŭvaŭ hetaje pytańnie padčas telefonnaj razmovy ź nievialikaj hrupaj kanhresmienaŭ ad Demakratyčnaj partyi. Kiraŭnik Dziarždepa i zakanadaŭcy abmiarkoŭvali miery, jakija mohuć pryniać ZŠA ŭ adkaz na toje, što Azierbajdžan uziaŭ pad svoj kantrol terytoryju Nahornaha Karabacha. Blinkien, u pryvatnaści, skazaŭ, što ZŠA pierastanuć akazvać vajennuju dapamohu Baku.
U Dziarždepartamiencie admovilisia kamientavać telefonnuju razmovu Blinkiena, ale padkreślili, što ZŠA padtrymlivajuć suvierenitet i terytaryjalnuju cełasnaść Armienii i vystupajuć za vyrašeńnie kanfliktu šlacham pramych pieramovaŭ.
Paŭdniovaja Armienija raźmieščana pamiž asnoŭnaj častkaj Azierbajdžana i jaho ekskłavam — Nachičevanskaj aŭtanomnaj respublikaj, — jakija miažujuć z Turcyjaj i Iranam. Aficyjny Baku prapanuje prakłaści praź Siunikskuju vobłaść Armienii Zanhiezurski kalidor daŭžynioj kala 40 kiłamietraŭ, kab złučyć Azierbajdžan i Nachičevań. Baki damovilisia stvaryć kalidor u trochbakovym pahadnieńni, pryniatym u 2020 hodzie paśla zakančeńnia druhoj vajny ŭ Karabachu. Alijeŭ pahražaŭ vyrašyć hetaje pytańnie siłavym šlacham, zaznačaje Politico.