«U Hazie — etap sapraŭdnaj vajny». CACHAŁ raspavioŭ pra apieratyŭnuju abstanoŭku apošnich sutak
Pradstaŭnik armii abarony Izraila Daniel Chahary na bryfinhu ŭ subotu koratka padsumavaŭ apieratyŭnuju abstanoŭku na paŭdniovym i paŭnočnym frantach.
Paśla izrailskaha avijaŭdaru pa siektary Haza padymajecca dym, jaki vidać z poŭdnia Izraila. Subota, 28 kastryčnika 2023 hoda. Fota: Ohad Zwigenberg / AP
Pavodle jaho słoŭ, u Hazie Armija abarony Izraila prachodzić etapy sapraŭdnaj vajny, piša Bi-bi-si.
Chahary paćvierdziŭ, što ŭviečary piatnicy siły CACHAŁ uvajšli na terytoryju paŭnočnaj častki siektara Haza i pašyryli naziemnuju apieracyju z udziełam piachoty, braniatankavych, inžyniernych i artyleryjskich častak, jakija dziejničajuć pry mahutnaj ahniavoj padtrymcy.
Taksama CACHAŁ praciahvaje masiravanyja ataki z pavietra i mora.
Minułaj nočču izrailskimi siłami byli zabityja kamandujučy VPS CHAMAS, jakoha Izrail ličyć adnym z klučavych fihur u arhanizacyi kryvavaha napadu 7 kastryčnika, i kamandzir vajenna-marskoj bryhady Hazy. Taksama zabityja kamandziry niekalkich adździaleńniaŭ taktyčnaha źviana CHAMAS, zajaviŭ pradstaŭnik CACHAŁ.
«Vojski ŭsio jašče znachodziacca ŭ poli i praciahvajuć vajnu. My pracujem nad dasiahnieńniem metaŭ, jakija pastavili pierad saboj i jakija vyznačany dla nas: źniščeńnie CHAMAS, biaśpieka miežaŭ i namahańni pa viartańni vykradzienych. Usio heta razam źjaŭlajecca vyznačalnym pry acency situacyi i pryniaćci rašeńniaŭ Hienštabam i štaboŭ adpaviednych rodaŭ vojskaŭ», — zajaviŭ Daniel Chahary.
U subotu Izrail prapuścić u siektar Haza hruzy charčavańnia, vady i miedykamientaŭ, a CACHAŁ miž tym praciahnie raskryvać śvietu infarmacyju ab tym, jak CHAMAS ekspłuatuje i vykarystoŭvaje cyvilnaje nasielnictva Hazy ŭ svaich metach, skazaŭ jon.
Na paŭnočnym froncie (na miažy ź Livanam) u piatnicu ŭviečary CACHAŁ atakavaŭ vajskovuju infrastrukturu «Chiezbały» ŭ adkaz na ahoń u bok dziaržavy Izrail, zajaviŭ Chahary.
Na Zachodnim bierazie raki Iardan izrailskaje vojska znachodzicca ŭ stanie vysokaj hatoŭnaści, choć u hetym siektary apošnija sutki prajšli adnosna spakojna.
«Što tyčycca tyłu, ja zaklikaju hramadskaść praciahvać prytrymlivacca instrukcyj kamandavańnia tyłu, jakija abnaŭlajucca: jak siabie pavodzić, što rabić dla vyratavańnia žyćciaŭ, jak vykarystoŭvać abaronienyja prastory. Žyćciova važna sačyć za našymi instrukcyjami, a taksama za instrukcyjami orhanaŭ ułady. U subotu ŭviečary my budziem abnaŭlać ich znoŭ, kab hramadskaść viedała, što adbudziecca ŭ niadzielu», — skazaŭ pres-sakratar CACHAŁ u kancy bryfinhu.
Čytajcie taksama:
Łukašenka pra izrailska-paleścinski kanflikt: Heta amierykosy zakrucili hetu kaniciel