Rasija i Kitaj tajemna damaŭlajucca pra budaŭnictva padvodnaha tunela ŭ Kierčanskim pralivie — WP
Vydańnie The Washington Post pry dapamozie Słužby biaśpieki Ukrainy vyśvietliła, što Rasija i Kitaj rychtujuć sakretny prajekt, metaj jakoha budzie abaranić rasijskuju łahistyku i suviaź akupavanaha Kryma z astatniaj Rasijaj ad udaraŭ ukrainskaj armii. Kitaj baicca ahałoski.
Mienavita pad tak zvanym Krymskim mostam Rasija i Kitaj płanujuć pabudavać padvodny tunel, jaki budzie abaronieny ad napadaŭ z boku Ukrainy. Na zdymku — prykład adnaho z paśpiachovych udaraŭ USU pa moście. Fota: AP
Pavodle pierachoplenych rasijskich elektronnych listoŭ, jakimi SBU padzialiłasia z vydańniem The Washington Post, rasijskija i kitajskija kampanii płanujuć pabudavać padvodny transpartny tunel, jaki złučyć Rasiju i akupavany joju Krym.
«Meta prajekta dla Rasii — abarona łahistyki ad ukrainskich udaraŭ, a meta Kitaja — pašyreńnie svajoj hłabalnaj transpartnaj infrastruktury i partoŭ», — piša The Washington Post.
Vydańnie taksama vyśvietliła, što dla hetych met užo stvorany śpiecyjalny rasijska-kitajski kansorcyum, u jakim chočuć udzielničać struktury, źviazanyja ź siabram dziacinstva Pucina, aliharcham Arkadziem Rotenbierham, čyje kampanii ŭžo budavali Krymski most.
U toj ža momant z boku Kitaja da kansorcyuma płanuje dałučycca dziaržaŭny hihant CRCC (Kitajskaja čyhunačnaja budaŭničaja karparacyja), jaki pabudavaŭ mnohija z najbujniejšych aŭtamabilnych i čyhunačnych šlachoŭ pa ŭsim Kitai i ŭ apošnija hady ŭstanaviŭ značnyja suviazi z Rasijaj.
«U nas jość paćvierdžańnie ad našych kitajskich partnioraŭ ab hatoŭnaści adnoj z najbujniejšych kampanij Kitaja, CRCC, pryniać udzieł u jakaści hienieralnaha padradčyka ŭ budaŭnictvie tunela pad Kierčanskim pralivam», — napisana ŭ pierachoplenym liście rasijskaha biznesmiena Uładzimira Kalužnaha, jaki adkazvaje za rasijska-kitajski kansorcyum.
The Washington Post pasprabavaŭ źviazacca ź biznesmienam Kalužnym, ale toj adkazaŭ, što «nie adkazvaje varožym ŚMI». List Kalužnaha byŭ adrasavany Hieorhiju Muradavu, pastajannamu pradstaŭniku Respubliki Krym pry prezidencie Rasii Uładzimiry Pucinie.
U inšych pierachoplenych listach, nie źviazanych z Kalužnym, taksama adznačajecca, što «kitajskaja kampanija CRCC budzie ŭdzielničać u budaŭnictvie tunela tolki ŭ ramkach poŭnaj i strohaj sakretnaści» i što nazva kampanii budzie całkam zamieniena. Mierkavany košt prajekta — minimum 5 miljardaŭ dalaraŭ.
Kamientujučy publikacyju The Washington Post, amierykanskija čynoŭniki i ekśpierty miarkujuć, što va ŭmovach vajny budaŭnictva tunela budzie «vielmi składanym» pracesam, jaki moža akazacca takim ža ŭraźlivym dla ŭkrainskich napadaŭ, jak i Krymski most.
U svaju čarhu Kitaj, na dumku čynoŭnikaŭ ZŠA, moža sutyknucca z surjoźniejšymi sankcyjami, bo budaŭnictva tunela moža być rasceniena ŭ śviecie, jak pryznańnie hetaj krainaj Kryma rasijskim.
Čytajcie taksama:
Chto toj biełarus, jakoha zatrymali za padryŭ mašyny ŭ Krymie