Rasijski błohier paŭdzielničaŭ u tarhach za ŭčastak va ŭradavym pasiołku na Rubloŭcy. Akazałasia, pradavali kuratnik
«Kali pa teleku havorać pra pavyšeńnie koštu jajek, jany navat ujavić nie mohuć, u kolki hrošaj niekatorym abychodziacca chatnija jajki».
Fota kuratnika na ziamielnym učastku ŭ zakrytym elitnym pasiołku Piatrova-Dalniaje na Rubloŭcy. Krynica: fejsbuk-staronka błohiera Michaiła Žuchavickaha
Rasijski finansavy błohier Michaił Žuchavicki raspavioŭ u fejsbuku pra ŭdzieł u niadaŭnich tarhach za nievialiki ŭčastak ziamli (15 sotak), raźmieščany ŭ adnym z samych zakrytych i elitnych pasiołkaŭ Rasii.
«Jość miesca, dzie žyvuć pieršyja asoby krainy — pasiołak Piatrova-Dalniaje (terytaryjalna ŭ miežach Rubloŭcy. — «NN»). Tam kala 30 damoŭ, 10 ź jakich znachodziacca va ŭłasnaści administracyi prezidenta, a astatnija naležać top-čynoŭnikam.
Niečakana na dziaržaŭnych tarhach pa pryvatyzacyi vyjšaŭ maleńki ŭčastak u 15 sotak, ale pry hetym vyciahnuty i kryvy, bo maje tolki 10 mietraŭ šyryni. Pry hetym na papiaredni ahlad učastka nikoha nie puskali, bo pasiołak zakryty i ačepleny dvuma kardonami achovy, u tym liku FSA», — padzialiŭsia Žuchavicki.
Pa jaho słovach, košt učastka pačynaŭsia z 15 miljonaŭ rasijskich rubloŭ (kala $170 tysiač), i na im zabaraniałasia budavać dom. Staronku z łotam da tarhoŭ bačyła tolki 200 čałaviek, što, na dumku Žuchavickaha, źjaŭlajecca śmiešnaj i mizernaj kolkaściu.
Niepakoiła błohiera i jašče adna detal.
«Adzinaje, što mianie turbavała — heta najaŭnaść na ŭčastku kuratnika adnoj ź pieršych asob krainy. Pa susiedstvie ź im žyvie jašče adzin vielmi ŭpłyvovy čałaviek, jaki prymaje stratehičnyja rašeńni. A druhi susied — ścipły piensijanier, u minułym uładalnik załatoha batona ŭ katedžy pad Kijevam», — napisaŭ Žuchavicki.
Dalej, jak apisaŭ błohier, jon unios zakład i pačalisia tarhi.
Žuchavicki chutka vylecieŭ, bo jaho maksimalnaja staŭka za ŭvieś pieryjad tarhoŭ składała 19,5 miljona rasijskich rubloŭ. A voś jaho kankurenty daviali košt da 240 miljonaŭ — $2,67 miljona!
«Epiłoh: 240 miljonaŭ z kapiejkami za pusty i kryvy ŭčastak z kuratnikam, na jakim niemahčyma pabudavać dom, bo zabarona. Ci zachavajecca tam kuratnik, albo ciapier tam buduć paŭliny — ja nie viedaju.
Kali pa teleku havorać pra pavyšeńnie koštu jajek, jany navat ujavić nie mohuć, u kolki hrošaj niekatorym abychodziacca chatnija jajki. A jašče hetyja tarhi pakazvajuć, dzie tvajo miesca ŭ ijerarchii», — padahulniŭ błohier.
Michaił Žuchavicki. Fota: fejsbuk-staronka błohiera
Čytajcie taksama:
Pucinu pabudavali jašče i sakretnuju sietku čyhunak i stancyj — jany viaduć da jaho rezidencyj
Viktoryja Azaranka zdaje dom u Drazdach. Jak vam interjery? FOTY
Kiraŭnica pieradvybarnaha štaba Cichanoŭskaj nabyła «Tesłu». U tvitary pakupku acanili nie ŭsie