«Navošta nam hetyja haziety? Čytać u ich niama čaho!»
Ministerstva infarmacyi ŭ čarhovy raz admoviła ŭ rehistracyi vydańniu «Mahiloŭski čas». Treciaja admova — i novaja pryčyna, kab nie dać niezaležnaj haziecie pracavać lehalna.
Ministerstva infarmacyi ŭ čarhovy raz admoviła ŭ rehistracyi vydańniu «Mahiloŭski čas». Treciaja admova — i novaja pryčyna, kab nie dać niezaležnaj haziecie pracavać lehalna.
Pieršaja sproba zarehistravać «Mahiloŭski čas» jak hramadska‑palityčnaje vydańnie była ździejśniena sioleta ŭ vieraśni. Da hetaha hazieta vychodziła ŭ vyhladzie małafarmatvaha vydańnia nakładam u 299 asobnikaŭ. Praź miesiac paśla padačy dakumientaŭ u Ministerstva infarmacyi zasnavalnica vydańnia Hanna Iljina atrymała list, padpisany namieśnikam ministra Alaksandra Słabadčuka. U im paviedamlałasia, što haziecie admoŭlena ŭ rehistracyi praz toje, što Iljina, jak budučaja hałoŭnaja redaktarka vydańnia, musić mieć vyšejšuju adukacyju.
Hanna Iljina vykanała patrabavańnie Mininfarmacyi. Źmianiŭšy hałoŭnaha redaktara, jana znoŭ padała dakumienty na rehistracyju. U druhi raz vydańnie admovili rehistravać, bo da dakumientaŭ nie była prykładzienaja kopija damovy zasnavalnika i jurydyčnaj asoby, na jakuju ŭskładajucca funkcyi redakcyi.
Treciuju admovu ŭ rehistracyi «Mahiloŭskamu času» padpisaŭ ciapierašni ministr infarmacyi Aleh Pralaskoŭski. Jana była abhruntavana tym, što pamiaškańnie nie adpaviadaje normam zakanadaŭstva. Prablemy z pamiaškańniem nasamreč byli, i źjavilisia jany paśla taho, jak na sajcie mahiloŭskaha harvykankamu na imia staršyni źjaviŭsia list ad «žycharoŭ rajona Kałužski Mahilova». «Žychary» vykazali zaniepakojenaść tym, što ŭ ich rajonie źjavicca novaja hazieta dy drukarnia (ukazaŭšy jurydyčny adras haziety «Mahiloŭski čas»): heta, maŭlaŭ, pahoršyć biez taho kiepskija ŭmovy dla žyćcia ludziej.
«Da i navošta nam hetyja haziety, kolki ŭžo hetych hazietaŭ u horadzie napładzili? Čytać u ich niama čaho! Prosim nie dapuścić hetaje biasčynstva», — było napisana ŭ zvarocie.
Pavodle słovaŭ Iljinoj, nakont taho, što ŭ mahiloŭskich hazietach niama čaho čytać — adziny punkt, ź jakim pahadziłasia redakcyja «Mahiloŭskaha času». Mienavita tamu i ŭźnikła žadańnie pašyreńnia i aficyjnaj rehistracyi vydańnia. Paśla publikacyi zhadanaha zvarotu Hańnie patelefanavaŭ arendadaŭca i paviedamiŭ, što praz hety list jaho pačali praviarać pažarniki i sanstancyja. Jon taksama paviedamiŭ, što da 15 studzienia jana musić padpisać damovu ab skasavańni damovy, bo pamiaškańnie začyniajecca na rekanstrukcyju.
Jak adznačyła zasnavalnica vydańnia, isnuje niekalki realnych pryčyn taho, što «Mahiloŭski čas» nie žadajuć rehistravać. «Pa‑pieršaje, my niaŭdała abrali čas dla rehistracyi, tamu što ŭłady rychtujucca da vybaraŭ, a pa‑druhoje, pryvatnaja inicyjatyva ŭ nas karajecca. I heta tyčycca nie tolki srodkaŭ masavaj infarmacyi» — zajaviła jana.
Z momantu pieršaj sproby rehistracyi vydańnie nie vychodzić u druk. Jak zaznačyła Ilna, jana nie źbirajecca zdavacca i budzie padavać dakumienty na rehistracyju čaćviorty raz.