Biełaruskaja delehacyja nakiravałasia ŭ Maskvu dla praciahu pieramoŭ pa nafcie
U skład delehacyi ŭvachodziać staršynia kancerna «Biełnaftachim» Valeryj Kazakievič i namieśnik ministra ekanomiki Anatol Fiłonaŭ.
5 studzienia biełaruskaja delehacyja nakiravałasia ŭ Maskvu dla pradaŭžeńnia pieramoŭ pa ŭmovach pastaŭki nafty ŭ 2010 hodzie.
Pra heta paviedamiŭ pres‑sakratar premjer‑ministra Biełarusi Alaksandr Cimašenka.
U skład delehacyi ŭvachodziać staršynia kancerna «Biełnaftachim» Valeryj Kazakievič i namieśnik ministra ekanomiki Anatol Fiłonaŭ. «Delehacyja nakiroŭvajecca dla pradaŭžeńnia pieramoŭ i kančatkovaha ŭzhadnieńnia pratakoła ab uniasieńni źmianieńniaŭ u mižuradavaje pahadnieńnie ŭ halinie ekspartu nafty i naftapraduktaŭ ad 12 lutaha 2007 hoda», — paviedamiŭ Cimašenka.
4 studzienia aficyjny pradstaŭnik Ministerstva enierhietyki RF Iryna Jesipava abvierhła infarmacyju, što źjaviłasia ŭ ŚMI, ab tym, što biełaruska‑rasijskija pieramovy ŭ paniadziełak nie adnaŭlalisia. «Pieramoŭny praces ź biełaruskim bokam pradaŭžajecca i nie spyniaŭsia», — padkreśliła pradstaŭnik Minenierha.
Siońnia pres‑sakratar dziaržkancerna «Biełnaftachim» Maryna Kaściučenka patłumačyła, što pieramovy pa nafcie iduć «u dystancyjnym režymie».
Jana padkreśliła, što «Biełnaftachim» nie maje nijakich prablem z pastaŭkami nafty z Rasii. «Nafta jak pastupała, tak i pastupaje.
Ź minułaha dnia ničoha nie źmianiłasia. Pradpryjemstvy pracujuć u zvyčajnym režymie», — skazała Kaściučenka.
***
Jak paviedamlałasia raniej, Biełaruś i Rasija nie zmahli padpisać pahadnieńnie ab umovach pastaŭki nafty ŭ zapłanavany termin, 30—31 śniežnia. Rasija abjaviła ab rašeńni pastaŭlać naftu ŭ Biełaruś z 1 studzienia 2010 hoda, uklučajučy ŭ canu 100% standartnaj ekspartnaj pošliny. U 2009 hodzie ŭ canu ŭvachodziła śpiecpošlina ŭ pamiery 35,6% standartnaj ekspartnaj pošliny.
U adkaz urad Biełarusi zajaviŭ ab biesprecedentnym nacisku z boku Rasii na pieramovach ab pastaŭkach nafty. Pry hetym abodva baki vykazali hatoŭnaść praciahvać pieramovy.
U «Biełnaftachimie» paviedamili, što zapampoŭvańnie rasijskaj nafty na biełaruskija NPZ pačałosia 3 studzienia ŭ adpaviednaści z raniej zaklučanymi kantraktami. «Naftu my svoječasova apłacili da novaha hoda, ciapier hetyja kantrakty vykonvajucca. Zavody pracujuć», — zajaviŭ u intervju dziaržaŭnamu ahienctvu BiełTA načalnik upraŭleńnia kaardynacyi syravinnych pastavak «Biełnaftachima» Siarhiej Astapiec.
Jon taksama adznačyŭ, što kožny hod u śniežni, uličvajučy doŭhija navahodnija kanikuły ŭ Rasii, biełaruskija NPZ zabiaśpiečvajuć zapasy naftavaj syraviny ŭ maksimalna mahčymym abjomie. Na 1 studzienia reziervuary AAT «Naftan» i AAT «Mazyrski NPZ» byli zapoŭnienyja naftaj.
Ciapier zahruzka biełaruskich NPZ aptymalnaja. Pavodle słoŭ Astapca, dziejučyja kantrakty praduhledžvajuć abjomy pastavak nafty, dastatkovyja dla zabieśpiačeńnia ŭstojlivaj zahruzki biełaruskich NPZ na praciahu najbližejšych troch tydniaŭ.