Milicyja zaklikaje zabojcu kasira «Absalutbanka» źjavicca z pakajańniem
Znojdzieny nož, jakim była zabitaja kasirka.
Ad imia śledstva pa spravie ab zabojstvie 21‑hadovaj kasirki abmiennaha punkta valut «Absalutbanka»
načalnik adździeła infarmacyi i suviaziej z hramadskaściu Hienieralnaj prakuratury Piotr Kisialoŭ zaklikaŭ złačynca źjavicca z pakajańniem.
Na sustrečy z žurnalistami 5 studzienia Kisialoŭ adznačyŭ, što ŭ vypadku jaŭki z pakajańniem
«pakarańnie, kaniešnie, budzie, ale miera adkaznaści ŭ hetym vypadku — inšaja».
Raskazvajučy ab znojdzienym dokazie — samarobnym kuchonnym nažy z nabornaj ručkaj, pradstaŭnik Hienprakuratury paviedamiŭ, što praź niekalki dzion paśla zabojstva jaho znajšła žančyna. Nož byŭ znojdzieny na adlehłaści ŭ niekalki socień mietraŭ ad miesca złačynstva, u dvary doma ŭ rajonie skryžavańnia Partyzanskaha praśpiekta z vulicaj Varvašeni, dzie kala univiersama «Avtazavodski» znachodziŭsia abmienny punkt.
Pavodle słoŭ Kisialova, paśla praviedzienych ekśpiertyz
možna praktyčna sa stopracentnaj upeŭnienaściu skazać, što znojdzieny nož źjaŭlaŭsia pryładaj złačynstva.
«Dziakujučy hetamu možna vyjści na mierkavanaha złačynca», — skazaŭ pradstaŭnik Hienprakuratury. Jon nie staŭ adkazvać na pytańnie, ci znojdzieny na nažy adbitki, adznačyŭšy, što daśledavańnie rečavaha dokazu praciahvajecca. U pryvatnaści, na pradmiet vyvučeńnia sastavu stali, kab daviedacca, ź jakoj zahatoŭki i dzie jon moh być zrobleny.
Pavodle słoŭ Kisialova, taki nož moh być vyrableny ŭ zavodskich abo samatužnych umovach, i dla jaho vytvorčaści asablivych navykaŭ nie treba. Nie vyklučyŭ pradstaŭnik Hienprakuratury i taho, što nož moh być vyrableny ŭ miescach pazbaŭleńnia voli.
Jon paviedamiŭ, što žančyna, jakaja znajšła nož, nie zastaniecca biez uznaharody.
Jak adznačyŭ Kisialoŭ, pa spravie «apytany tysiačy ludziej, vyśvietleny niekatoryja cikavyja abstaviny», ab jakich jon havaryć nie staŭ, spasyłajučysia na tajnu śledstva.