Uschopčyka nie vydaduć, bo jon baraniŭ SSSR
Litoŭskaja hienprakuratura atrymała adkaz z hienprakuratury Biełarusi na prośbu ab vydačy hienierała Uładzimira Uschopčyka.
Litoŭskaja hienprakuratura atrymała adkaz z hienprakuratury Biełarusi na prośbu ab vydačy hienierała Uładzimira Uschopčyka.
U adkazie Hienieralnaj prakuratury skazana, što Litvie nie budzie akazana dapamoha pa spravie 13 studzienia. Paŭtorny zvarot z prośbaj vykanać adpaviednyja pracesualnyja dziejańni ŭ adnosinach padazravanych Uładzimira Uschopčyka i Stanisłava Juanienie ŭ Biełaruś byŭ nakiravany vosieńniu 2009 hoda.
«Admoŭny adkaz Biełarusi nie źmienić našu jurydyčnuju acenku: toje, što było ździejśniena ŭ Litvie ŭ studzieni 1991 hoda suprać abaroncaŭ svabody - heta złačynstva, kryminalnaja adkaznaść za heta budzie pahražać nie tolki ŭ Litvie, ale i va ŭsim JEZ», — cytuje ru.DELFI.lt słovy litoŭskaha prakurora Alhimantasa Klunki.
Pavodle Klunki, biełaruskaja hienprakuratura paŭtaryła svaju pazicyju: učynki padazravanych jana aceńvaje zhodna z zakonam, što dziejničaŭ u toj čas — zakonam SSSR — jak imknieńnie abaranić kanstytucyjny stroj toj dziaržavy i jaho terytaryjalnuju cełasnaść, z hetaj pryčyny i nie moža akazać pravavuju dapamohu.
Akramia taho, pavodle damovy ab pravavoj dapamozie pamiž Litvoj i Biełaruśsiu, ekstradycyja biełaruskich hramadzian abo pracesualnyja dziejańni ŭ adnosinach da ich niemahčymyja.
«Vykanańnie prośby Litvy pa hetaj spravie supiarečyła b asnoŭnym pryncypam zakonaŭ Respubliki Biełaruś», - skazana ŭ liście.
Hienprakuratura nahadvaje, što sprava ab padziejach 13 studzienia skončana i pieradadziena ŭ sud 19 červienia 1996 hoda. Pa hetaj spravie byli abviešačany prysudy Mikołasu Burakiavičusu, Juozasu Jermałavičusu, Juozasu Kualalisu, Lavonasu Bartašavičusu, Stanisłovasu Mickiavičusu i Jarasłavu Prakapoviču. 19 lutaha 2008 hoda Jeŭrapiejski sud pa pravach čałavieka pryniaŭ rašeńnie adchilić zajavu Burakiavičusa i inšych abvinavačanych pa hetaj spravie i kanstatavaŭ, što litoŭskaja prakuratura i sud naležnym čynam užyli ŭsie pravavyja normy i padčas pracesu nie parušyli pravoŭ čałavieka.
U časie zmahańnia za adnaŭleńnie niezaležnaści Litvy vojski pad kiraŭnictvam hienierała Ŭschopčyka zachapili vilenskuju televiežu. Pry hetym 16 demanstrantaŭ zahinuli. Rabiłasia toje na prośbu «rabotnicka-sialanskaha ŭrada Litvy», na čale z Burakiavičusam.