Amierykanskija aftalmołahi: pachod u 3D kinateatr moža škodzić zdaroŭju
Biełarusy na toje nie zvažajuć. Ažyjataž, jak pierad adkryćciom «Kijeva», naziraŭsia tolki pierad matčami BATE.
U Biełarusi adbyŭsia pieršy pakaz filma 3D. Heta byŭ užo ŭsim viadomy «Avatar», jaki demanstravaŭsia ŭ adnoŭlenym i pieraabstalavanym minskim kinateatry «Kijeŭ».Čerhi za kvitkami la kinateatru źjavilisia adrazu paśla pastupleńnia ich u kasy. Navat za 15 chvilin da pačatku filma, a 8-aj hadzinie viečara na niesłabym marozie pierad kasami kinateatra viravaŭ natoŭp.
Padobny ažyjataž naziraŭsia ŭ Minsku tolki pierad hulniami BATE ŭ jeŭrapiejskich topavych turnirach, kali za kvitkami na stadyjon taksama ŭtvaralisia vialikija čerhi.
Cikavaść da premjery zrazumiełaja. Kali na Zachadzie 3D kinateatry ŭžo stali zvyčajnaj źjavaj, to ŭ nas adkryŭsia pieršy. Šmat chto śćviardžaje, što prychod novych technałohij ŭ mastactva kino zrobić čarhovuju revalucyju. Padobnuju toj, jakuju zrabili źjaŭleńnie huku i koleru.
Isnujuć taksama i schavanyja niedachopy, jakija nie afišujucca. Amierykanskija aftalmołahi ŭžo daŭno zaŭvažyli, što dla niekatorych ludziej pachod u 3D kinateatr skončycca tolki hałaŭnym bolem – ich mozh prosta admovicca ŭsprymać taki film. A jak mohuć paŭpłyvać novyja kinateatry na zdaroŭje ludziej u pierśpiektyvie zastajecca tolki zdahadvacca.
Zrešty, naŭrad ci niechta admovicca ad novych technałohij. Jak niekali sotavaja suviaź, heta vielmi prybytkovaja sprava. Kvitki ŭ «Kijeŭ» kaštujuć u dva razy bolš, čym ŭ zvyčajny kinateatr, a jaho raskład raśpisany da leta. Niehledziačy na vielmi nievialikuju kolkaść stužak, jakija buduć tam demanstravacca, biez hledačoŭ jon nie zastaniecca. Novaje i niezvyčajnaje zaŭsiody pryciahvaje.
Pieršy sieans u «Kijevie»