Vučonyja znajšli sposab vyroščvać novyja zuby

U chutkim časie impłanty nie spatrebiacca. U čym sutnaść?

Fota: Andriy Onufriyenko / Getty Images

Da hetaha času ličyłasia, što ŭ darosłych ludziej paśla straty zuboŭ novyja mohuć być tolki štučnymi. Ale japonskija vučonyja śćviardžajuć, što znajšli preparat, jaki dazvolić zubam vyraści. Užo ŭ vieraśni jon budzie ŭviedzieny ŭnutryvienna pieršym dobraachvotnikam.

Da svajho adkryćcia, jak piša vydańnie New Atlas, vučonyja z Kijockaha ŭniviersiteta išli šmat hadoŭ. Pieršapačatkova ekśpierymienty pravodzilisia na myšach i pakazali vydatnyja vyniki: preparat stymulavaŭ rost novych zuboŭ. Paśla hetaha byli praviedzienyja ekśpierymienty na tcharach, u jakich struktura zuboŭ padobnaja da čałavieka.

Jak raskazvajuć vučonyja, ich preparat uvodzicca ŭnutryvienna i deaktyvizuje białok USAG-1, jaki padaŭlaje rost zuboŭ. Błakiroŭka ŭzajemadziejańnia USAG-1 ź inšymi białkami stymuluje pieradaču sihnałaŭ kaściavoha morfahienietyčnaha białka (VMR), što zapuskaje stvareńnie novaj kaścianoj tkanki i rost zuboŭ.

U vieraśni hetaha hoda vučonyja źbirajucca vyprabavać preparat na ludziach. Va Univiersiteckaj balnicy Kijota jon budzie ŭviedzieny 30 mužčynam va ŭzroście ad 30 da 65 hadoŭ, u jakich adsutničaje chacia b adzin karaniovy zub. Ekśpierymient budzie praciahvacca 11 miesiacaŭ.

Na druhim etapie vučonyja źbirajucca vyprabavać preparat na pacyjentach va ŭzroście ad 2 da 7 hadoŭ, chvorych na pryrodžanuju niedastatkovaść zuboŭ, u jakich adsutničajuć jak minimum čatyry zuby. Ludziej z takim hienietyčnym zachvorvańniem, pa acenkach, kala 1 % u śviecie.

Paśla hetaha ekśpierymientam pavinny być achoplenyja ludzi, u jakich adsutničaje ad adnaho da piaci zuboŭ z-za ŭździejańnia źniešnich faktaraŭ.

Aŭtary technałohii raźličvajuć, što preparat budzie prymianiacca nie tolki pry pryrodžanych zachvorvańniach, ale i va ŭsich, chto straciŭ zuby ŭ lubym uzroście. U vypadku pośpiechu hetaja terapija budzie dastupnaja pacyjentam, u jakich niama zuboŭ, na praciahu šaści hadoŭ.

Kamientary da artykuła