Departamient dziaržaŭnaj biaśpieki Litvy prakamientavaŭ prysud litoŭcy za špijanaž
Paśla taho, jak u 11 červienia Minski haradski sud pryznaŭ Alenu Ramanaŭskienie, hramadzianku Litvy, supracoŭnicu sanatoryja «Biełaruś» u litoŭskich Druskienikach, vinavataj u špijanažy, u Departamiencie dziaržaŭnaj biaśpieki Litvy zajavili, što heta «biespadstaŭnyja insinuacyi».
Alena Ramanaŭskienie
«Adna z hałoŭnych apor biełaruskaha režymu — KDB — vystaviŭ absurdnyja abvinavačańni ŭ tym, što jana, pražyvajučy ŭ Litvie, naniesła škodu nacyjanalnaj biaśpiecy Biełarusi», — havorycca ŭ kamientary dla ŚMI, piša lrt.lt.
Minski haradski sud pryznaŭ Alenu Ramanaŭskienie vinavataj u špijanažy i pryhavaryŭ jaje da šaści hadoŭ pazbaŭleńnia voli.
«Abvinavačańni, pradjaŭlenyja Ramanaŭskienie, nie adpaviadajuć rečaisnaści, — davodzić DDB. — Ramanaŭskienie nie ažyćciaŭlała nijakaj dziejnaści, jakaja mahła b niejkim čynam naškodzić Biełarusi, tamu hetyja abvinavačańni zjaŭlajucca biespadstaŭnymi insinuacyjami».
Jak paviedamiŭ telekanał ANT, supracoŭnica sanatoryja «Biełaruś» u Druskininkaj Ramanaŭskienie pryznana vinavataj u ahienturnaj dziejnaści. Sud byŭ zakryty. 59-hadovuju žančynu abvinavacili ŭ nieadnarazovaj pieradačy infarmacyi ab haściach, u tym liku ab vysokapastaŭlenych słužbovych asobach Biełarusi. Śćviardžajecca, što jana była zavierbavanaja litoŭskimi śpiecsłužbami bolš za 10 hadoŭ tamu.
U MZS Litvy BNS ukazali, što viedajuć pra situacyju, ale padkreślivajuć, što ŭ ich niama padstaŭ vieryć u abhruntavanaść abvinavačańniaŭ.
U ministerstvie taksama nahadvajuć ab rekamiendacyi nie jeździć u Biełaruś, padkreślivajučy, što hramadzian Litvy mohuć niezakonna zatrymlivać, pradjaŭlać im sfabrykavanyja abvinavačańni i dapytvać u biełaruskich strukturach biaśpieki.
Ramanaŭskienie mahła być zatrymana biełaruskimi siłavikami jašče letaś, kali jana viartałasia ŭ Litvu ź Biełarusi, dzie naviedvała členaŭ svajoj siamji.
Uletku minułaha hady biełaruskija ŚMI taksama paviedamili, što byłoha hałoŭnaha doktara sanatoryja «Biełaruś» Andreja Kobiela buduć sudzić za špijanaž u karyść Litvy. Jon byŭ zatrymany biełaruskim KDB u kancy 2022 hoda. Ciapier ANT paviedamiŭ, što jon byŭ prysudžany da dzieviaci hadoŭ pazbaŭleńnia voli. Pa infarmacyi kanała, jon užo adbyvaje pakarańnie.
Čytajcie taksama:
Zatrymanaja litoŭskaja «špijonka» akazałasia supracoŭnicaj sanatoryja «Biełaruś»
Byłoha hałoŭnaha lekara biełaruskich sanatoryjaŭ u Druskienikach i Sočy buduć sudzić za «špijanaž»
Za špijanaž aryštavali hramadzianku Litvy Alenu Ramanaŭskienie