Prahnoz Suśvietnaha banka pa roście suśvietnaj ekanomiki palepšaŭ. Što nakont Biełarusi?
Suśvietny bank u svaim śviežym dakładzie ab hłabalnych ekanamičnych pierśpiektyvach pierahledzieŭ svoj bolš rańni prahnoz pa roście suśvietnaha VUP — čakańni arhanizacyi stali bolš aptymistyčnymi.
Fota: Per-Anders Pettersson / Getty Images
U dakumiencie ŭkazana, što paśla niekalkich hadoŭ šokaŭ rost suśvietnaj ekanomiki zastaniecca stabilnym u 2024 hodzie, a potym paskorycca ŭ bližejšyja paru hadoŭ, u tym liku dziakujučy aściarožnamu źmiakčeńniu hrašova-kredytnaj palityki pa miery pastupovaha źnižeńnia inflacyi, piša myfin.by.
U pačatku hoda śpiecyjalisty Suśvietnaha banka pradkazvali rost hłabalnaha VUP na ŭzroŭni 2,4%, adnak zaraz čakajuć, što jon składzie 2,6%.
Pavodle acenki arhanizacyi, ekanomiki raźvitych krain vyrastuć u 2024 hodzie ŭ siarednim na 1,5%: u ZŠA — na 2,5%, u jeŭrazonie — na 0,7%, u Japonii — na tyja ž 0,7%. Dla krain, jakija raźvivajucca, siarednija tempy buduć na ŭzroŭni 4%: dla Indyi — 6,6%, Kitaja — 4,8%, Nihieryi — 3,3%, Rasii — 2,9%, Saudaŭskaj Aravii — 2,5%, Brazilii — 2%.
U toj ža čas u 2025 i 2026 hadach rost VUP płaniety pavinien skłaści 2,7%.
Pry hetym u arhanizacyi adznačyli, što hłabalnyja ekanamičnyja pierśpiektyvy ŭsio jašče zastanucca słabymi, asabliva ŭ krainach, što raźvivajucca. Na heta ŭpłyvajuć ryzyki eskałacyi hieapalityčnaj napružanaści, dalejšaj frahmientacyi handlu i bolš vysokich pracentnych stavak, a taksama stychijnych biedstvaŭ, źviazanych sa źmianieńniem klimatu.
Prahnoz Suśvietnaha banka adnosna ekanomiki Biełarusi na hety raz zastaŭsia niaźmiennym u paraŭnańni z acenkaj, zroblenaj u krasaviku: VUP našaj krainy ŭ 2024 hodzie pavialičycca na 1,2 pracenta, u 2025 hodzie — na 0,7 pracenta, u 2026 hodzie — na 0,5%.
Čytajcie taksama:
Što adbyłosia z ekanomikaj Arhienciny za šeść miesiacaŭ pracy novaha prezidenta