Biełaruski niezaležnicki błok pryrastaje rehijonami
U Homieli stvorana jaho abłasnaja struktura.
U Homieli 3 lutaha pradstaŭniki demakratyčnych sił — niezarehistravanych partyj i hramadzianskich inicyjatyŭ — padpisali pahadnieńnie ab stvareńni abłasnoj struktury Biełaruskaha niezaležnickaha błoka.
Jak paviedamiŭ adzin z arhanizataraŭ mierapryjemstva, kaardynatar pa stvareńni partyi «Biełaruskaja chryścijanskaja demakratyja» Kanstancin Žukoŭski, pad pahadnieńniem ab stvareńni abłasnoj struktury błoka padpisalisia pradstaŭniki niezarehistravanaj partyi «BCHD», zarehistravanaha ŭ Čechii hramadskaha abjadnańnia «Małady front» i ruchu salidarnaści «Razam».
«Niekatoryja subjekty stvoranaha ŭ kastryčniku 2009 hoda ŭ Minsku BNB nie pryjšli na sustreču, praihnaravali naša zaprašeńnie, da prykładu, ruch «Za Svabodu». Ale my pavažajem vybar hetaha ruchu i hatovy da dyjałohu», — skazaŭ Žukoŭski.
Pavodle jaho słoŭ, pierad strukturaj staić zadača
kaardynacyi dziejańniaŭ jaje subjektaŭ padčas palityčnych kampanij — prezidenckich vybaraŭ i vybaraŭ u miascovyja saviety deputataŭ.
«My damovilisia pracavać na miascovych vybarach u farmacie «adna akruha — adzin kandydat». Raźličvajem, što i na budučych prezidenckich vybarach my budziem padtrymlivać adnaho kandydata», — padkreśliŭ Žukoŭski. Zadačami dla struktury błoka na najbližejšy čas jon nazvaŭ arhanizacyju nazirańnia na vybarach, stvareńnie pravaabarončaha orhana, kaardynacyju dziejańniaŭ i kanstruktyŭny dyjałoh ź inšymi apazicyjnymi strukturami, u pryvatnaści z homielskaj kaalicyjaj demakratyčnych sił. «Z ADS my budziem supracoŭničać, bo tam šmat dastojnych ludziej, u pieryjad vybaraŭ my budziem z kaalicyjaj kansultavacca pa roznych pytańniach. Nam niama čaho dzialić, nas i tak niašmat», — prakamientavaŭ Žukoŭski.
Abłasnaja struktura padpisała rezalucyju, u jakoj jaje subjekty zajavili ab padtrymcy palitźniavolenych, pryznańni hamialčanina Vasila Takarenki palitźniavolenym, pryjarytecie chryścijanskich kaštoŭnaściej, vystupili za spynieńnie kryminalnaha pieraśledu aktyvistaŭ apazicyi, nasilnaha pryzyvu ŭ armiju, za pryniaćcie zakona ab alternatyŭnaj słužbie.