Sidorski i Pucin sustrenucca 16 sakavika ŭ Breście
Prem`ier‑ministr Biełarusi Siarhiej Sidorski płanuje sustrecca sa staršynioj urada Rasii Uładzimiram Pucinym 16 sakavika ŭ Breście. Pra heta Siarhiej Sidorski paviedamiŭ 3 lutaha žurnalistam u Homieli.
Pavodle jaho słoŭ, za apošnija piać dzion jon dvojčy razmaŭlaŭ pa telefonie sa svaim rasijskim kaleham. Hałoŭnyja temy — supracoŭnictva ŭ enierhietycy, budaŭnictvie i chimičnaj pramysłovaści.
Sidorski taksama prakamientavaŭ novyja ŭmovy pastavak rasijskaj nafty ŭ Biełaruś. «Zhodna z dasiahnutymi damoŭlenaściami dla ŭnutranaha spažyvańnia Biełaruś atrymaje biaspošlinna 6,3 młn. ton rasijskaj nafty i poŭnaściu zabiaśpiečyć patrebnaści biełaruskaha rynku», — skazaŭ prem`ier‑ministr. Jon adznačyŭ, što astatniaja nafta budzie iści ŭ Biełaruś z pošlinami 100%, jakija dziejničajuć na terytoryi Rasijskaj Fiederacyi da ŭviadzieńnia adzinaj mytnaj terytoryi ŭ miežach Mytnaha sajuza».
«Heta značyć z 1 studzienia hetaha hoda ŭ nas dziejničaje adziny mytny taryf, z 1 lipienia 2010 hoda budzie adzinaja mytnaja terytoryja, a zatym — da 2012 hoda — my pavinny vyjści na adzinuju ekanamičnuju prastoru,
— patłumačyŭ Sidorski. — Druhi i treci kroki padrazumiavajuć novyja varyjanty supracoŭnictva ŭ paliŭna‑enierhietyčnaj śfiery. Jany pavinny być adlustravany ŭ novaj prahramie supracoŭnictva Biełarusi i Rasii ŭ paliŭna‑enierhietyčnaj śfiery».