U kabiniecie hieahrafii ŭsiaho 5 hradusaŭ, a ŭ małodšaj hrupie sadka ŭ Zanaračy było +7
Maładziečanski mižrajonny kamitet dziaržkantrolu vyjaviŭ parušeńni sacyjalnych standartaŭ ciapła ŭ sadkach, škołach i žyłych damach u Miadzielskim i Maładziečanskim rajonach.
Maładziečanski mižrajonny kamitet dziaržaŭnaha kantrolu vyjaviŭ parušeńni sacyjalnych standartaŭ ciapła ŭ sadkach, škołach i žyłych damach u Miadzielskim i Maładziečanskim rajonach Minskaj vobłaści.
Supracoŭniki Kamiteta dziaržkantrolu paviedamili našamu vydańniu: u prybiralni sadka, što ŭ Zanaračy, 22 studzienia było 7 hradusaŭ ciapła, u spalni — 9. U inšych pamiaškańniach trochu ciaplej. 11 hradusaŭ u raździavałcy, u hrupavym pakoi starejšaj hrupy — 15 hradusaŭ.
Mierźli ŭ hety dzień taksama vučni Zanarackaj siaredniaj škoły. Naprykład, u kabiniecie bijałohii było 16 hradusaŭ,
a voś u kabiniecie hieahrafii ŭsiaho tolki 5.
U Kamitet dziaržkantrolu na nizkuju tempieraturu va ŭstanovach adukacyi paskardzilisia taksama žychary Čyści i vioski Zaskavičy Maładziečanskaha rajona.
Pakutavali ad choładu žychary niekatorych kvater doma №25, što pa vulicy Kamunistyčnaj u Miadziele.
Tempieratura ŭ hetych kvaterach była ad 11 da 14 hradusaŭ.
Revizory dziaržkantrolu źviazvajuć takuju situacyju ź nieapraŭdana zaciahnutym kapitalnym ramontam hetaha doma.
Raboty pa kapramoncie viaducca ad žniŭnia 2008 hoda. Niahledziačy na nadychod zimy, tut nie zavieršany ramont bałkonaŭ i šyfiernaha dachu. Z‑za nizkaj tempieratury na vulicy ŭ vaśmi kvaterach pramierźli bałkonnyja ramy. U sanvuzłach usich kvater raźbityja stajaki sistem kanalizacyi i vientylacyi, što pavialičvaje stratu ciapła.
Pa ŭsich faktach Kamitet dziaržkantrolu Minskaj vobłaści nakiravaŭ u Minabłvykankam piśmo z prapanovaj nieadkładna vypravić stanovišča, a vinavatych u drennym zabieśpiačeńni ludziej kamunalnymi pasłuhami pryciahnuć da adkaznaści.
Sinoptyki prahnazujuć u lutym jašče adno panižeńnie tempieratury. Zakončyć ramont doma ŭ Miadziele na praciahu miesiaca nie paśpiejuć.
Dziciačy sadok, škoła i fielčarska‑akušerski punkt u Zanaračy aciaplajuć katły, jakija palacca tolki suchimi dravami, a ich nie zaŭsiody chapaje.
A heta značyć, u lutaŭskija mocnyja marazy studzieńskaja situacyja moža paŭtarycca.