Biełaruś naprošvajecca na davalnickuju pierapracoŭku nafty sa spłataj 100% mytaŭ u rasijski biudžet

Sidorski taksama zajaviŭ pra zacikaŭlenaść biełaruskaha ŭrada ŭ pryvatyzacyi naftapierapracoŭčaha zavoda «Naftan» u Navapołacku.

«My zacikaŭleny, kab rasijskija [naftavyja] kampanii pracavali na biełaruskim rynku, — paviedamiŭ žurnalistam u Homieli Siarhiej Sidorski. — I zrobim usio dla taho, kab dziejničała pahadnieńnie, jakoje padpisali ŭ Maskvie». Prem'jer-ministr rastłumačyŭ, što zhodna z pahadnieńniem rasijskija i biełaruskija kampanii buduć mieć prava zavieźci naftu sa 100-pracentnaj pošlinaj na biełaruski rynak, pierapracavać jaje na naftapierapracoŭčych pradpryjemstvach respubliki i vyvieźci naftapradukty nazad u Rasiju. U hetaj situacyi Siarhiej Sidorski adznačyŭ nieabchodnaść praličyć ekanomiku nazvanaha miechanizma. «Tut mahčyma niekatoraje mikšyravańnie pry pierapracoŭcy, bo akramia bienzinu, dyzpaliva, my majem i inšyja kampanienty chimii. Treba znajści mahčymaść, jakaja daść biźniesu dadatkovy dachod u nazvanaj śfiery», — adznačyŭ jon. Pry hetym usie dachody davalnickaha režymu buduć pieraličacca ŭ biudžet Rasii. «Takija harantyi my dali», — dadaŭ premjer.

Biełaruski bok taksama prapanavaŭ rasijskim kaleham, kab «Rośniefť» i «Hazpromniefť» (jana vałodaje dolaj Mazyrskaha naftapierapracoŭčaha zavoda) razhledzieli pierśpiektyvy raboty na biełaruskim rynku. Jany mahli b zarehistravać svaju daččynuju kampaniju ŭ Biełarusi ŭ adpaviednaści z nacyjanalnym zakanadaŭstvam i vieści prazrystuju pierapracoŭku nafty, jakaja pastupaje z Rasii sa 100-pracentnaj pošlinaj z dalejšaj pastaŭkaj naftapraduktaŭ u Rasiju, udakładniŭ Siarhiej Sidorski.

Pavodle infarmacyi prem'jer-ministra, prezident Rasii daručyŭ pravieści raźliki pa vykazanaj biełaruskim bokam prapanovie. «Dumaju, što ŭ bližejšy čas my atrymajem adkaz, hałoŭnaje, kab biełaruskija i rasijskija kampanii pracavali prazrysta», — adznačyŭ kiraŭnik urada.

Siarhiej Sidorski płanuje sustrecca sa staršynioj urada Rasii Uładzimiram Pucinym 16 sakavika ŭ Breście. Za apošnija 5 dzion jany dvojčy razmaŭlali praz telefon. U Homieli Sidorski taksama zajaviŭ pra zacikaŭlenaść biełaruskaha ŭrada ŭ pryvatyzacyi naftapierapracoŭčaha zavoda «Naftan» u Navapołacku.

U studzieni abjom vytvorčaści naftachimii skaraciŭsia na 8% praź pieraboi z pastaŭkami rasijskaj nafty.

Kamientary da artykuła