Udzielnikaŭ akcyi salidarnaści z Aŭtuchovičam i Asipienkam adpuścili
Aktyvistaŭ apazicyi, zatrymanych padčas akcyi salidarnaści ź Mikałajem Aŭtuchovičam i Uładzimiram Asipienkam viečaram 8 lutaha ŭ Minsku, adpuścili biez składańnia pratakołaŭ.
Pra heta paviedamiŭ pres‑sakratar hramadzianskaj inicyjatyvy «Jeŭrapiejskaja Biełaruś» Alaksandr Atroščankaŭ.
20 čałaviek, jakija brali ŭdzieł u akcyi na Kastryčnickaj płoščy, byli dastaŭleny va UUS Centralnaha rajona Minska.
«Tam ich pastavili tvaram da ściany, nie davali razmaŭlać pamiž saboj. Tych, kaho zatrymali ŭ pieršy raz, źniali na fota i videa, taksama ŭ ich uziali adpiačatki palcaŭ.
Prykładna praź dźvie hadziny ŭsich adpuścili biez składańnia pratakołaŭ», — skazaŭ Atroščankaŭ.
Va ŭsich aktyvistaŭ na ciele majucca siniaki i drapiny, paviedamiŭ Atroščankaŭ. «Heta vynik nadzvyčaj žorstkaha zatrymańnia ich supracoŭnikami pałka milicyi śpiecyjalnaha pryznačeńnia», — zaznačyŭ jon.
Jak raniej paviedamlałasia, viečaram 8 lutaha ŭ Minsku aktyvisty maładziožnaj apazicyi pasprabavali pravieści akcyju salidarnaści z Aŭtuchovičam i Asipienkam, jakija znachodziacca pad vartaj užo hod.
Prykładna ŭ 18.00 jany vystrailisia na Kastryčnickaj płoščy, trymajučy ŭ rukach partrety vaŭkavyskich pradprymalnikaŭ.
Amal adrazu da ich padbiehli ludzi ŭ cyvilnym i ŭziali ŭ koła. Pry hetym dva milicyjaniery ŭ formie papiaredžvali prysutnych pra niezakonnaść ich dziejańniaŭ.
Praź dźvie‑try chviliny na płošču pryjechali dva aŭtobusy z supracoŭnikami pałka milicyi śpiecyjalnaha pryznačeńnia, jakija zatrymali maładych ludziej.
Jak i raniej, nieviadomyja ŭ cyvilnym pieraškadžali pracy žurnalistaŭ, zakryvali abjektyvy fota‑ i videakamier, sprabavali adcisnuć žurnalistaŭ ad miesca padziei. Jany nie dazvolili padyści da ŭdzielnikaŭ akcyi pradstaŭnikam ŚMI z dyktafonami.