KDK prapanavaŭ Saŭminu vyzvalić ad pasady staršyniu kancerna «Biellespapierapram»
Kalehija Kamiteta dziaržaŭnaha kantrolu (KDK), što prajšła 5 lutaha, prapanavała Savietu ministraŭ vyzvalić ad pasady staršyniu kancerna «Biellespapierapram» Uładzimira Šulhu.
Jak paviedamiła pres‑słužba KDK, jon «nie zabiaśpiečyŭ u 2008—2009 hadach efiektyŭnuju pracu haliny».
Prapanavana vyzvalić ad pasady i namieśnika staršyni «Biellespapieraprama» Siarhieja Ivanova «za niezdavalniajučuju arhanizacyju rabot pa realizacyi ŭ asobnych pradpryjemstvach inavacyjnych prajektaŭ».
Pavodle vynikaŭ pravierki departamientu finansavych rasśledavańniaŭ kamiteta daručana vyvučyć materyjały z metaj vyjaŭleńnia ŭ dziejańniach słužbovych asob kancerna «Biellespapierapram» prykmietaŭ supraćpraŭnaj dziejnaści. Materyjały pravierki nakiravany ŭ Hienieralnuju prakuraturu. Za 2007—2009 hady ahulnaja suma dziaržpadtrymki, akazanaj kancernu, skłała 314 młrd. rubloŭ. Arhanizacyjam kancerna byli dadzieny padatkovyja i mytnyja lhoty, ustanoŭleny bolš nizkija taryfy na enierharesursy, kampiensavany bankaŭskija pracenty, akazana finansavaja dapamoha ŭ vyhladzie subsidyj.
Abaviazkovaj umovaj akazańnia dziaržaŭnaj padtrymki źjaŭlałasia vykanańnie arhanizacyjami pakazčykaŭ tempu rostu abjomaŭ vytvorčaści i ŭzroŭniu rentabielnaści. U 2007 hodzie z 35 arhanizacyj, jakija atrymali dziaržpadtrymku, daviedzienyja pakazčyki nie vykanali 19, u 2008 hodzie z 25 arhanizacyj — 16, u 2009 hodzie z 24 arhanizacyj — 22. U paraŭnańni z 2008 hodam kolkaść stratnych pradpryjemstvaŭ kancerna pavialičyłasia z 14 da 26, čystyja straty ŭzraśli z 27,1 da 66,3 młrd. rubloŭ. Pry hetym rentabielnaść realizavanaj pradukcyi źniziłasia bolš čym u 2,5 razu.
Z metaj techničnaha pieraŭzbrajeńnia ajčynnych pradpryjemstvaŭ da kanca 2010 hoda ŭ arhanizacyjach kancerna pavinna być zavieršana 14 prajektaŭ pa stvareńni novych i madernizacyi dziejnych vytvorčaściej. Adnak praviedzieny analiz chodu realizacyi hetych prajektaŭ pakazaŭ, što nivodzin ź ich u pieršapačatkova ŭstanoŭleny termin vykanany nie budzie.
Pravierkaj ustanoŭlena, što ŭ 2009 hodzie siaredniamiesiačnaja zarabotnaja płata ŭ aparacie kiravańnia kancerna ŭ 3,6 razu pieravyšała jaje siaredni ŭzrovień u kancernie (2,7 młn. rubloŭ suprać 754 tys. rubloŭ). Da prykładu, siaredniamiesiačnaja zarpłata staršyni kancerna ŭ 2009 hodzie składała 6,9 młn. rubloŭ, načalnika adździeła aparatu kiravańnia kancerna — 3,09 młn., hałoŭnaha śpiecyjalista — 2,4 młn., dyrektara navučalnaha centra pa padrychtoŭcy, pavyšeńni kvalifikacyi i pierapadrychtoŭcy kadraŭ lasnoha kompleksu — 5,8 młn. rubloŭ.