U aŭtobusie, jaki jechaŭ z Polščy ŭ Biełaruś, znajšli 19 karaleŭskich pitonaŭ
Źmiej kanfiskavali i adpravili ŭ zaapark — tam zadavolenyja.
Fota: DMK
Bresckija mytniki znajšli 19 karaleŭskich pitonaŭ u rejsavym aŭtobusie, jaki jechaŭ z Polščy ŭ Biełaruś.
Kiroŭca schavaŭ pitonaŭ u śpiecyjalnym tajniku ŭ prystupkach aŭtobusa. Na miažy jon zajaviŭ, što viazie tolki asabistyja rečy.
Mytnikaŭ niešta naściarožyła, i jany vyrašyli pravieści dadatkovy kantrol. Skanahrama pakazała, što ŭ prystupkach niešta schavana, paviedamlaje Mytny kamitet.
Adkruciŭšy samarezy na paneli prystupki, mytniki dastali ź nišy piać płastykavych kantejnieraŭ ź pitonami. Razam z žyviołami pad prystupkaj kiroŭca schavaŭ i šeść manomietraŭ vahoj 40 kh.
Kiroŭca zajaviŭ, što pieravieźci źmiej i manomietry jaho paprasiŭ nieznajomy čałaviek u Varšavie. Pry hetym kantaktaŭ asoby, jakoj treba było pieradać źmiej, u kiroŭcy nie było.
U vyniku mytniki kanfiskavali źmiej, manomietry i aŭtobus. Pitonaŭ pieradali ŭ Minski zaapark. Śpiecyjalisty raspaviali, što takaja afarboŭka pitonaŭ źjaŭlajecca dla zaaparka ekskluzivam.