Dziaržsakratar ZŠA Blinkien: Vybary 2025 hoda ŭ Biełarusi nie mohuć być spraviadlivymi va ŭmovach represij
Dziaržsakratar ZŠA asudziŭ cenzuru i adsutnaść svabody słova, a taksama represii režymu Łukašenki, vykazaŭšy niedavier da budučych vybaraŭ prezidenta Biełarusi.
Entani Blinkien. Fota: Alex Brandon / AP
U piatnicu Dziaržsakratar ZŠA Entani Blinkien zrabiŭ zajavu, tekst jakoj pryviedzieny na sajcie Dziarždepartamienta ZŠA, paviedamlaje «Hołas Amieryki».
«Prezidenckija vybary 2025 hoda ŭ Biełarusi nie mohuć być svabodnymi abo spraviadlivymi va ŭmovach ciapierašniaha represiŭnaha asiarodździa, — adznačana ŭ zajavie Dziaržsakratara. — Sistematyčnyja namahańni režymu Łukašenki pa padaŭleńni luboha inšadumstva zahadzia vyznačyli vyniki vybaraŭ zadoŭha da taho, jak byli padadzienyja niejkija biuleteni, pazbaŭlajučy biełaruski narod mahčymaści samastojna vybirać svaich lidaraŭ i vyznačać svajo budučyniu».
Blinkien patłumačyŭ, što «vybary nie mohuć być davieranymi va ŭmovach, kali cenzura ŭsiudyisnaja, niezaležnyja ŚMI bolš nie isnujuć, dzie ŭ biuleteniach mohuć źjaŭlacca tolki kandydaty, zaćvierdžanyja režymam, a členy apazicyi albo znachodziacca ŭ turmach, albo ŭ vyhnańni».
Niahledziačy na niekalki sieryj prezidenckich pamiłavańniaŭ z boku Alaksandra Łukašenki, biełaruskija žurnalisty pastajanna padviarhajucca pieraśledu, zatrymańniam i asudžajucca na hady turemnaha źniavoleńnia, najčaściej za svaju pracu ŭ ŚMI, jakija ŭłady nazyvajuć «ekstremisckimi».
«Złučanyja Štaty asudžajuć kampaniju represij režymu Łukašenki, — adznačyŭ Blinkien. — Represii naradžajucca sa słabaści, a nie sa siły. Biesprecedentnyja miery pa padaŭleńni luboha inšadumstva vyrazna pakazvajuć, što režym Łukašenki baicca ŭłasnaha naroda».
Dziaržsakratar adznačyŭ śmiełaść i vyklučnuju nastojlivaść biełaruskich hramadzian i arhanizacyj hramadzianskaj supolnaści, jakija pracujuć nad tym, kab pryciahnuć režym da adkaznaści.
Blinkien paviedamiŭ, što ŭ turmach režymu ŭ ahulnaj składanaści znachodzicca amal 1 300 palityčnych źniavolenych.
«Złučanyja Štaty stajać na baku biełaruskaha naroda ŭ ich imknieńni da prazrystaści, demakratyi i svabody», — zajaviŭ u zaklučeńni Entani Blinkien.