U Aŭstralii maci abvinavacili ŭ tym, što atruciła ŭłasnaje dzicia dziela padpisčykaŭ i achviaravańniaŭ
Žančyna śćviardžała, što ŭ sacyjalnych sietkach viadzie chroniku baraćby svajoj dački ź nievylečnym zachvorvańniem. Ale ŭvodziła adnaletniamu dziciaci niedazvolenyja rečyvy, paśla čaho zdymała na videa, jak dačka pieražyvaje «vialikija pakuty i bol».
Palicyja Kvinślenda
Aŭstralijskuju influensierku abvinavacili ŭ atručvańni svajoj dački. Miarkujecca, što jana zrabiła heta dziela atrymańnia achviaravańniaŭ i pavieličeńnia kolkaści padpisčykaŭ u sacsietkach, piša Bi-bi-si.
Žančyna z Kvinślenda śćviardžała, što ŭ sacyjalnych sietkach viadzie chroniku baraćby svajoj dački ź nievylečnym zachvorvańniem. Ale, pavodle detektyvaŭ, jana ŭvodziła adnaletniamu dziciaci niedazvolenyja rečyvy, paśla čaho zdymała na videa, jak dačka pieražyvaje «vialikija pakuty i bol».
Miedyki zabili tryvohu ŭ kastryčniku, kali dzicia było špitalizavana z surjoznym zachvorvańniem.
Paśla niekalkich miesiacaŭ rasśledavańnia 34-hadovuju žančynu abvinavacili ŭ katavańniach, užyvańni atruty, stvareńni materyjałaŭ dla ekspłuatacyi dziaciej i machlarstvie.
«Nie chapaje słoŭ, kab apisać, nakolki ahidnyja złačynstvy takoha charaktaru,» — zajaviŭ detektyŭ-inśpiektar palicyi Kvinślenda Poł Dałtan u čaćvier padčas razmovy z žurnalistami.
Z žniŭnia pa kastryčnik, pavodle detektyvaŭ, žančyna z rehijona Sanšajn-Kost davała dziciaci niekalki recepturnych i aptečnych lekaŭ biez dazvołu na ich vykarystańnie.
Palicyja pačała rasśledavańnie 15 kastryčnika, kali dzicia było dastaŭlena ŭ balnicu z «mocnymi emacyjnymi i fizičnymi pakutami i traŭmami». Testy na niesankcyjanavanyja leki dali stanoŭčy vynik.
Žančyna sabrała 60 000 aŭstralijskich dalaraŭ (37 300 dalaraŭ ZŠA) praz achviaravańni na płatformie GoFundMe. Pa słovach inśpiektara Dałtana, sajt zaraz sprabuje viarnuć hetyja srodki.
Palicyja praviała rasśledavańnie, ci nie byli datyčnyja da hetaha inšyja asoby, ale padstaŭ dla abvinavačvańnia kaho-niebudź inšaha nie vyjaviła.