Sud u Sieule aryštavaŭ adchilenaha ad ułady prezidenta Paŭdniovaj Karei Jun Sok Jola
Akruhovy sud u Sieule ŭ niadzielu vydaŭ ordar na aryšt adchilenaha ad ułady prezidenta Paŭdniovaj Karei Jun Sok Jola. Jaho padazrajuć u sprobie arhanizacyi ŭzbrojenaha pieravarotu i złoŭžyvańni ŭładaj. Jon byŭ zatrymany 15 studzienia, paviedamlaje Yonhap.
Fota: Yonhap News
Sudździa paličyŭ, što znachodziačysia na svabodzie, Jun, adchileńnie jakoha jašče pavinien uchvalić Viarchoŭny sud, moh by źniščyć dokazy mierkavanaha złačynstva. Ciapier jon moža znachodzicca pad vartaj da 20 dzion z momantu zatrymańnia albo da vystaŭleńnia aficyjnaha abvinavačańnia.
U adkaz Sieuł achapili šmattysiačnyja akcyi pratestu — hrupa pratestoŭcaŭ uvarvałasia ŭ sud, raźbivajučy vokny, špurlajučy kresły, śmiećcie i inšyja pradmiety, a taksama raspylajučy vohnietušycieli ŭ palicyjantaŭ, što achoŭvali budynak.
3 śniežnia Jun paśla doŭhaha kanfliktu z parłamienckaj apazicyjaj abviaściŭ pra ŭviadzieńnie vajennaha stanovišča ŭ krainie. U krainie byli zabaronienyja palityčnyja partyi, pratesty, strajki, ukaz prypyniaŭ pracu parłamienta, uvodziŭ cenzuru i palavyja trybunały.
Juna padazrajuć u tym, što adnačasova jon zahadaŭ vojskam aryštavać členaŭ parłamienta, kab tyja nie admianili prezidencki ŭkaz. Deputaty prahałasavali za admienu vajennaha stanovišča ŭ toj ža čas, kali vajskoŭcy sprabavali zachapić budynak parłamienta.