Minimum 90 tysiač — stolki rasijskich sałdat zahinuła na vajnie z Ukrainaj
Heta tyja zahinułyja, čyje imiony vyznačyli žurnalisty «Bi-bi-si» i «Miedyjazony». Pry hetym realnaja kolkaść zahinułych rasijskich vajskoŭcaŭ moža być ad 138 tysiač da 200 tysiač čałaviek.
Rekłama na prypynku ŭ Ćviery, vierasień 2024 hoda. Fota: sacsietki
Žurnalistam viadomy imiony 90 019 zahinułych rasijskich sałdat na vajnie z Ukrainaj.
23% usich zahinułych — heta značyć praktyčna kožny čaćviorty — heta tyja, chto padpisaŭ kantrakt užo paśla pačatku vajny.
Dla paraŭnańnia, da listapada 2023 hoda dobraachvotniki składali tolki 14% ad ahulnaj kolkaści strat.
Siaredni ŭzrost zahinułych u 2024 hodzie, pavodle ŭdakładnienych źviestak, skłaŭ 36 hadoŭ. Heta bolš, čym u pieršyja dva hady vajny.
17% usich viadomych zahinułych — heta źniavolenyja, jakija źjechali na front z papraŭčych kałonij. 12% zahinułych byli mabilizavanymi.
Z kastryčnika 2023 hoda žurnalisty fiksujuć rezki i stabilny rost strat siarod dobraachvotnikaŭ. Pry hetym dola źniavolenych pastupova źnižajecca.
Najpierš heta źviazana z tym, što ciapier na front čałavieka sprabujuć adpravić jašče da sudu. Letaś Dziaržduma aformiła zakony, jakija dazvalajuć prypynić kryminalnuju spravu, kali abvinavačany padpisaŭ kantrakt z vojskam. Takich ludziej uličvajuć jak dobraachvotnikaŭ.