Masažyst stryptyz-kłuba ŭ Rasii arhanizavaŭ bandu, jakaja vymahała hrošy ŭ rasijskich vajskoŭcaŭ
Da bandy jon dałučyŭ niekalki fitnes-trenieraŭ.
Hrupoŭka, jakaja składałasia z masažysta, achoŭnika stryptyz-kłuba, jaki vydavaŭ siabie za bajca PVK «Vahnier», i niekalkich fitnes-trenieraŭ, zajmałasia vymahańniem hrošaj u vajskoŭcaŭ i pradprymalnikaŭ, paviedamlaje Baza.
Jany adpraŭlali da ich niepaŭnaletnich dziaŭčat dla akazańnia intym-pasłuh, a potym patrabavali hrošy dla niezaviadzieńnia spravy.
U hrupoŭki było niekalki kirunkaŭ. Z vajskoŭcami z Rastoŭskaj vobłaści, DNR, ŁNR i Zaparožža padazravanyja pracavali praz dvuch niepaŭnaletnich dziaŭčat. Jany śpisvalisia z vajskoŭcami na sajtach internet-znajomstvaŭ, ustupali ź imi ŭ intym, a zatym raptam źjaŭlałasia «palicyja» — vajskoŭcaŭ vykradali i patrabavali ŭ ich bolš za 3 młn rubloŭ (30 tysiač dalaraŭ) za niezaviadzieńnie kryminalnaj spravy.
Taksama členy hrupoŭki «pracavali» z pradprymalnikami z Rastoŭskaj vobłaści. Ich zapałochvali z dapamohaj iłžebajca PVK «Vahnier». Kali ŭ padazravanych uźnikała niejkaja sprečka ź biznesoŭcam, da jaho dasyłali «bajca» sa zbrojaj, jaki na spravie byŭ uchilistam ad mabilizacyi i pracavaŭ masažystam, achoŭnikam u stryptyz-kłubie i fitnes-trenieram.
Razam ź fiktyŭnym vajskoŭcam, pracavali i iłže-sachraŭcy — na spravie fitnes-treniery adnaho z rastoŭskich kłubaŭ.
Dla bolšaj pierakanaŭčaści na «novych terytoryjach» da achviar padsyłali zvyčajnaha hramadzianina RF, jaki pradstaŭlaŭsia pamočnikam paŭnamocnaha pradstaŭnika prezidenta ŭ ŁNR, DNR, Chiersonskaj i Zaparožskaj abłaściach.
Pavodle źviestak FSB, u skład hrupoŭki ŭvachodzili 11 čałaviek. Pry pieratrusach u ich znajšli vajennuju formu z šaŭronami, steroidy, mocnadziejnyja rečyvy i achałoščanuju zbroju. Adzin z padazravanych paśla abviaščeńnia ŭ vyšuk pasprabavaŭ uciačy, ale byŭ zatrymany ŭ Maskvie. Ciapier usie mierkavanyja ŭdzielniki AZH siadziać u SIZA Rastova. Raspačatyja spravy ab vykradańni čałavieka i vymahalnictvie.