U Hrodnie sabaka ŭciok z domu i ciapier katajecca pa horadzie na aŭtobusach i tralejbusach
Aŭčarka Najda pierasadžvajecca z aŭtobusaŭ na tralejbusy i kalasić pa ŭsim Hrodnie, a jaje nijak nie mohuć złavić.
Sabaka Najda. Fota: «AŭtaHrodna»
U Hrodnie niamieckaja aŭčarka pa mianušcy Najda ŭciakła z doma i ciapier katajecca pa ŭsim horadzie na hramadskim transparcie. Miascovyja žychary nijak nie mohuć jaje złavić i pieradać haspadaram.
Najda biez kanca pierasadžvajecca z adnaho tralejbusa ŭ druhi, zabiahaje ŭ aŭtobusy i apieratyŭna źmianiaje vulicu za vulicaj. Jak raspaviała haspadynia, uciok sabaka nočču: dzieci zabylisia začynić bramku, piša «AŭtaHrodna».
«My žyviom u pryvatnym siektary na Janki Kupały i viečaram našy dzieci zabylisia začynić bramku. Siońnia ranicaj my zaŭvažyli, što Najda ŭciakła. Ja adrazu ž raźmiaściła abjavy pra pošuk u roznych čatach i mnie pačali prychodzić paviedamleńni ad roznych ludziej pra toje, što naš sabaka katajecca na hramadskim transparcie», — raspaviała Kaciaryna.
Pa paviedamleńniach vidavočcaŭ haspadynia adnaviła maršrut padarožža Najdy.
«A 5 ranicy našaha sabaku bačyli kala «Aŭtobusnaha parku», dzie Najda sieła ŭ aŭtobus numar 35, a zatym vyjšła na vulicy Lidskaj. Jašče adzin čałaviek paviedamiŭ, što na Lidskaj naš sabaka sieŭ ŭ tralejbus № 3. Potym jaho bačyli kala pomnika tanku na Savieckaj płoščy, i jon špacyravaŭ pobač ź dziećmi. Potym Najda znoŭ sieła ŭ tralejbus № 3 i vyjšła kala «Doma suviazi». Tam jana pierasieła ŭ tralejbus № 12 i paśla hetaha jaje ŭžo nie bačyli», — kaža Kaciaryna.
Fota: «AŭtaHrodna»
Adkul u sabaki takaja luboŭ da aŭtobusaŭ i tralejbusaŭ, skazać składana.
«My sami heta rastłumačyć nie možam. Jana z nami jeździć tolki ŭ aŭtamabili. Tolki adnojčy, hadoŭ piać tamu, Najda vybiehła z dvara i na bližejšym prypynku skočyła ŭ aŭtobus. Tady jana taksama prakaciłasia na hramadskim transparcie, ale my jaje chutka znajšli», — adznačyła haspadynia.
Kaciaryna kaža, što Najda tavaryski i pasłuchmiany sabaka. Jana idzie da ruk i lubić čałaviečaje tavarystva. Tych, chto sustreŭ sabaku ŭ horadzie, haspadynia prosić źviazacca ź joj pa telefonie: +375336856497.