Padčas palotu ŭ samalocie pamierła žančyna, ekipaž nie zmoh jaje pieranieści z sałona i tamu pasadziŭ u pasažyrskaje kresła
Para, jakaja lacieła ŭ doŭhačakany adpačynak, praviała pobač z pamierłaj žančynaj niekalki hadzin.
Ilustracyjnaje fota Joan Valls / Urbanandsport / NurPhoto via Getty Images
Niekalki dzion tamu para z Aŭstralii raskazała, što pieražyła ciažki dośvied padčas rejsa ź Mielburna ŭ Dochu na borcie samalota avijakampanii Qatar Airways, piša Bi-bi-si.
Paciarpiełych pasažyraŭ zavuć Mitčeł Rynh i Dženifier Kolin. Jany raspaviali aŭstralijskamu telekanału Channel Nine pra ciažkaści, ź jakimi sutyknulisia padčas doŭhačakanaha adpačynku, kali lacieli ŭ Vieniecyju ź pierasadkaj u Dosie, stalicy Katara.
Apošnija čatyry hadziny z čatyrnaccacihadzinnaha pieralotu z Aŭstralii ŭ Katar im daviałosia pravieści pobač ź ciełam pamierłaj žančyny.
Padčas palotu adna z pasažyrak, čyjho imia nie nazyvajuć, straciła prytomnaść, a potym pamierła ŭ prachodzie pobač z Rynham i Kolin. Pavodle słoŭ pary, ekipaž sprabavaŭ, ale nie zmoh pieranieści cieła žančyny ŭ biznes-kłas. Jak paviedamiŭ Rynh, «jana była davoli bujnoj damaj, i jany nie zmahli praciahnuć jaje praz prachod».
U vyniku bortpravadniki paprasili Rynha pasunucca i «pasadzili» cieła žančyny na jaho miesca, niahledziačy na toje, što ŭ samalocie jašče byli svabodnyja miescy. Jamu samomu nie prapanavali pierasieści.
Jak adznačyŭ Rynh, piersanał zreahavaŭ «imhnienna», kali žančyna straciła prytomnaść, ale, na žal, vyratavać jaje nie ŭdałosia. Nazirać za hetym taksama było vielmi ciažka.
Kali samalot pryziamliŭsia praz čatyry hadziny, pasažyraŭ paprasili zastavacca na svaich miescach, pakul na bort padymalisia miedyki i palicyja.
«Ja nie mahu pavieryć, što jany paprasili nas zastacca na svaich miescach. Heta było davoli niepryjemna ź ich boku», — zajaviŭ Rynh.
Pa słovach pary, nichto z bortpravadnikoŭ nie prapanavaŭ im nijakaj padtrymki abo psichałahičnaj dapamohi padčas hetaj situacyi.
Dženifier Kolin nazvała hety vypadak «traŭmujučym».
«My całkam razumiejem, što nie možam uskładać adkaznaść na avijakampaniju za śmierć biednaj žančyny, ale pavinien isnavać pratakoł pa dohladzie za pasažyrami na borcie», — dadała jana.
Incydent vyklikaŭ debaty nakont pracedur reahavańnia na śmierć ludziej padčas palotu.
U svaim pieršapačatkovym zajavie Qatar Airways pryniesła prabačeńni i paviedamiła, što źviazałasia jak ź siamjoj pamierłaj, tak i z paciarpiełymi pasažyrami.
«My źviazalisia ź siamjoj pamierłaha pasažyra, kab vykazać spačuvańni ŭ suviazi ź ich strataj. My taksama niepasredna parazmaŭlali z paciarpiełymi pasažyrami, kab abmierkavać ich chvalavańni», — adznačałasia ŭ zajavie.
U piatnicu, 28 lutaha, pradstaŭniki Qatar Airways zajavili, što dziejańni ekipaža ŭ suviazi sa śmierciu žančyny «adpaviadali padrychtoŭcy i standartnaj praktycy ŭ avijacyjnaj halinie».
«Pasažyry byli pierasadžanyja na inšyja miescy, a člen ekipaža pastajanna znachodziŭsia pobač z pamierłaj pasažyrkaj na praciahu ŭsiaho palotu da pryziamleńnia ŭ Dosie», — havorycca ŭ zajavie kampanii. — «Na žal, realnaść takaja, što niečakanyja śmierci časam zdarajucca na borcie samalotaŭ, i našy členy ekipaža dobra padrychtavanyja da takich situacyj, dziejničajučy z maksimalnaj pavahaj i hodnaściu».
Avijakampanija taksama zajaviła, što prapanavała padtrymku i kampiensacyju siamji pamierłaj i inšym pasažyram, jakija niepasredna paciarpieli ŭ vyniku incydentu.
Były kapitan Virgin Atlantic Bary Justans paviedamiŭ BBC, što, pavodle jaho dośviedu, «ekipaž zvyčajna sprabuje izalavać cieła, kab pasažyry nie kantaktavali ź im, i naadvarot — z pavahi, zachavańnia pryvatnaści, a taksama ź miedycynskich pryčyn».
Pavodle kiraŭnictva Mižnarodnaj asacyjacyi pavietranaha transpartu (IATA) pa dziejańniach u vypadku śmierci na borcie, cieła pamierłaha varta pieramiaścić na kresła, pažadana ŭ zonu ź minimalnaj kolkaściu pasažyraŭ pobač, i nakryć koŭdraj abo śpiecyjalnym miaškom da šyi.
Taksama cieła možna pieranieści ŭ inšaje miesca, dzie jano nie budzie pieraškadžać prachodu abo vychadu.
Paśla pasadki asacyjacyja rekamienduje spačatku dazvolić usim pasažyram pakinuć samalot, pierš čym miascovyja ŭłady zojmucca ciełam.