U HUR raskazali, kolki rasijan ciapier vajuje va Ukrainie
«U rasijskich uładaŭ niama prablem z naboram vojskaŭ i papaŭnieńniem strat».
Rasijskija vajskoŭcy. Fota: Minabarony RF
Na akupavanych terytoryjach Ukrainy znachodzicca blizu 620 tysiač rasijskich vojskaŭ, paviedamiŭ pradstaŭnik HUR Mo Ukrainy Vadzim Skibicki ŭ intervju «RBK-Ukraina» .
«Kali my havorym pra suchaputny kampanient — heta prykładna 620 tysiač, pryčym bolš za 200 tysiač — heta tyja šturmavyja padraździaleńni, jakija ŭdzielničajuć u bajavych dziejańniach i znachodziacca na linii frontu. Akramia taho, heta 35 tysiač vajskoŭcaŭ Rashvardyi, jakija zabiaśpiečvajuć akupacyjnuju ŭładu, ažyćciaŭlajuć achovu najbolš važnych abjektaŭ na časova akupavanych terytoryjach», — adznačyŭ Vadzim Skibicki.
Taksama jon raspavioŭ, što Rasija płanuje pavialičyć u svaich akupacyjnych vojskach kolkaść tak zvanaha «śpieckantynhientu», to-bok źniavolenych ź miesc adbyćcia pakarańnia.
«Na 2025 hod, pavodle rasijskich płanaŭ, prykładna 30% tych ludziej, jakija nibyta dobraachvotna iduć u vojska — heta buduć tyja ludzi, jakija znachodziacca pad śledstvam, znachodziacca ŭ turmach abo tyja, jakija adbyvajuć umoŭny termin pakarańnia. I pakazanaja prablema ŭžo ŭstaje dla Hienieralnaha štaba US RF — što rabić z hetymi ludźmi, jak ź imi pracavać. U 2024 hodzie takoha kantynhientu — jany nazyvajucca «śpieckantynhient» — było 15%, a ciapier budzie 30%», — skazaŭ pradstaŭnik HUR MA Ukrainy.
Usiaho ŭ 2025 hodzie Maskva maje namier pryciahnuć u šerahi rasijskaj akupacyjnaj armii bolš za 340 tysiač kantraktnikaŭ.
«Kali kazać ab płanach — heta 343 tysiačy vajskoŭcaŭ, havorka idzie mienavita ab nabory pa kantrakcie. Ale pa vopycie 2024 hoda my viedajem, što hetyja płany mianiajucca — u bolšy bok. Naprykład, letaś była meta — nabrać prykładna 375-380 tysiač, zatym płany źmianilisia na 430 tysiač, a ŭ vyniku jany nabrali 440 tysiač vajskoŭcaŭ mienavita pa kantrakcie. Tut nieabchodna razumieć, što amal 80% tych, kaho nabirajuć pa kantrakcie, iduć na papaŭnieńnie bajavych strat», — patłumačyŭ Vadzim Skibicki.
Pavodle jaho słoŭ, u rasijskich uładaŭ niama prablem z naboram vojskaŭ i papaŭnieńniem strat.