U Nacyjanalnym histaryčnym archivie Biełarusi pierastanuć vydavać archiŭnyja spravy. Raniej było spyniena ich skanavańnie
U karystalnikaŭ archiva zastaŭsia miesiac, kab paśpieć adšukać patrebnyja archiŭnyja dakumienty.
Budynak archiva na vulicy Krapotkina ŭ chutkim časie čakaje kapitalny ramont. Fota: Huhł Karty
Na sajcie Nacyjanalnaha histaryčnaha archiva Biełarusi była apublikavana infarmacyja, što płanujuć zakryć usie archivaschoviščy, a taksama spyniać vydaču spraŭ naviedvalnikam.
Pryčynaj nazyvajecca pačatak budaŭniča-mantažnych rabot u ramkach kapitalnaha ramontu budynka. Praca pačniecca ŭ 2-m kvartale 2025 hoda, to-bok heta moža adbycca ŭžo ŭ krasaviku. Pra kankretnuju datu pačatku rabot archiŭ abiacaje paviedamić dadatkova. Płanujecca, što kapitalny ramont zojmie 5 miesiacaŭ.
Čytalnaja zała NHAB. Fota: Huhł Karty
Jašče ŭ krasaviku 2024 hoda spynili vykanańnie terminovych (pazačarhovych) rabot pa ličbavańni dakumientaŭ. A 26 žniŭnia 2024 hoda całkam prypynili pryjom zajaŭ na skanavańnie ad fizičnych asob. Choć paviedamlałasia, što adnaŭleńnie pasłuhi anansujuć dadatkova, z ulikam chutkaha pačatku ramontu skarystacca joj u najbližejšyja paŭhoda ci navat bolš nie atrymajecca.
Archivaschovišča NHAB. Fota: Sb.by
Pryčynaj spynieńnia pryjomu zajavak ad hramadzian nazyvałasia płanavaja padrychtoŭka archiŭnych dakumientaŭ da skanavańnia.
Jašče ŭ pačatku kastryčnika 2024-ha pa techničnych pryčynach była prypyniena vydača spraŭ z fondaŭ u archivaschoviščy №4, jakaja nie adnoŭlena dahetul. Na niejki pieryjad taksama spyniałasia vykanańnie bijahrafičnych zapytaŭ ad hramadzian.
Tumannyja farmuloŭki ŭ paviedamleńniach archiva naściarožvajuć ludziej, asabliva z ulikam taho, što kiravać biełaruskimi archivami paśla 2020 hoda pryznačali ŭ asnoŭnym byłych siłavikoŭ. Naprykład, pavodle infarmacyi «Našaj Nivy», ciapierašni dyrektar NHAB Michaił Hłušakoŭ, pryznačany ŭ žniŭni 2023 hoda, doŭhi čas słužyŭ u KDB. Adnak, najbolš vierahodna, što ciapierašnija abmiežavańni dla karystalnikaŭ archiva byli źviazanyja z padrychtoŭkaj da chutkaha ramontu.