Biełaruska ŭ Polščy prosić dapamohi dla svajoj dački, jakaja chvareje na limfomu
Kaciaryna Karzun razam z čatyrma dziećmi źjechała ź Biełarusi praz palityčnyja matyvy spačatku va Ukrainu, a potym ad vajny — u Polšču. U Polščy jaje dačka Daša zachvareła na limfomu. Užo druhi hod siamja zmahajecca z chvarobaj i prosić ab dapamozie.
Daša padčas chvaroby i pierad joj. Kałaž: MOST
Zaraz Dašy 20 hod. Pieršyja etapy lekavańnia limfomy byli nieefiektyŭnymi, raspaviadaje jaje maci. Za čas chvaroby dziaŭčynka apynałasia ŭ reanimacyi i lekary kazali, što jana moža nie vyžyć.
Dziakujučy CAR-T terapii biełaruscy stała lepiej, ale jana ŭsio jašče daloka ad poŭnaha adnaŭleńnia. Siamja źbiraje hrošy na polskaj płatformie Zrzutka i na PayPal.
Pieršy simptomy chvaroby siamja zaŭvažyła amal adrazu paśla pierajezdu ŭ Polšču: Daša mocna kašlała, časam traciła prytomnaść. Ale lekary skazali, što heta alerhičny spazm.
«Ja nastajała, kab Dašu pakłali ŭ špital. Joj pastavili dyjahnaz «vostry łarynhit», vypisali antybijotyki. Dašy stanaviłasia ŭsio horš. Dumali, što ŭ jaje zapaleńnie lohkich. Pa maim patrabavańni ŭsio ž zrabili kampjutarnuju tamahrafiju, jakaja pakazała novaŭtvareńni va ŭsich orhanach. Dašy zrabili niekalki apieracyj, usie novaŭtvareńni prybrali, akramia prysieńnia serca — tam była vializnaja puchlina pamieram 18 santymietraŭ. Jana cisnuła na ŭsie orhany: serca, aortu. Daša nie mahła havaryć, spać, u jaje razdźmułasia šyja, tvar. Chvaroba prahresavała», — raskazała Kaciaryna «Radyjo Svabodzie».
Akramia Dašy ŭ Kaciaryny jašče try dzicionki. Časam žančyna nie mahła pracavać, bo nieabchodna było znachodzicca pobač z Dašaj u balnicy. Kansultacyi ź lekarami, śpiecyjalnaje charčavańnie, arenda kvater i dadatkovyja leki patrabavali vialikich finansavych namahańniaŭ.
«Daša taksama naviedvaje psichołaha, psichijatra i kardyjołaha, i ŭsie hetyja vydatki kładucca na nas. Chvaroba mocna ŭdaryła pa jaje ahulnym stanie, i kali zdaroŭje dazvolić, nam treba budzie adnavić zuby, jakija paciarpieli padčas lačeńnia», — tłumačyć Kaciaryna.