Dačka hrodzienskaha siłavika zakryła svoj błoh ź niepalskaj turmy

Paśla taho, jak biełaruskija miedyi źviarnuli ŭvahu na turemny błoh hrodzienki Aliny Ałdošynaj, jakaja adbyvaje termin u niepalskaj turmie za sprobu pieravieźci 6 kh kakainu, dziaŭčyna vydaliła z sacsietak publikacyi, źviazanyja z turemnym pobytam, piša Hrodna.life.

Alina Ałdošyna. Fota: sacsietki

Pra ŭmovy ŭtrymańnia ŭ niepalskaj turmie Ałdošyna raskazvała spačatku ŭ Threads, a zatym u telehram-kanale «Uźnica Niepała». Tydzień tamu hrodzienka apublikavała ŭ Threads post, u jakim paviedamiła, što pakul nie budzie vieści kanał. U kamientarach Ałdošyna dadała, što budzie na suviazi, ale «biez turemnaha kantentu».

«Ja nie chaču, kab zhadka pra maju siamju była ŭ ŚMI ŭ RB», — dadała hrodzienka.

Telehram-kanał «Uźnica Niepała» u adkrytym dostupie praisnavaŭ sutki — paśla Ałdošyna schavała kantent. Instahram-akaŭnt hrodzienki aktyŭny, adnak schavany ad karystalnikaŭ, jakija na jaje nie padpisanyja.

Zakryty instahram Aliny Ałdošynaj. Skrynšot Hrodna.life

Pra Alinu Ałdošynu stała viadoma jašče ŭ kancy 2019 hoda. Tady jana, dačka tahačasnaha pieršaha namieśnika načalnika milicyi Leninskaha rajona Hrodna Alaksieja Ałdošyna, była aryštavanaja ŭ aeraporcie Katmandu z 6 kiłahramami kakainu, schavanaha ŭ zimovaj kurtcy. Razam ź joj byŭ zatrymany jaje siabar Pavieł Vasiljeŭ. Abodvum dali pa 15 hadoŭ źniavoleńnia.

Kamientary da artykuła