U Homielskaj vobłaści buduć raźvivać pramysłovuju vytvorčaść vinahradu
U Homielskaj vobłaści płanujecca raźvivać pramysłovuju vytvorčaść vinahradu, paviedamiła na pres‑kanfierencyi 12 maja staršynia kamiteta ekanomiki abłvykankama Elvira Karnickaja.
Pavodle jaje słoŭ, vinahradarstva ŭ vobłaści maje histaryčnyja karani i ciapier płanujecca jaho adradzić. Karnickaja adznačyła, što biełaruski vinahrad u suviazi z klimatyčnymi ŭmovami možna budzie vykarystoŭvać tolki dla vytvorčaści kańjaku, pakolki jon nie paśpiavaje nazapasić nieabchodnuju kolkaść cukru, kab užyvać jaho dla vyrabu vina.
Sioleta ŭ vyhladzie ekśpierymientu pasadžany čatyry hiektary vinahradniku ŭ saŭhasie «Uschod».
Vyniki možna budzie atrymać praz try‑čatyry hady, adznačyła pradstaŭnik abłvykankama.
Jak paviedamiŭ sustaršynia kampanii «Biełvinhrup» (handlovaja marka «Harsija») Siarhiej Ciuškievič, na terytoryi homielskaha zavoda vinahradnych vin «Jubilejny» płanujecca stvaryć biźnies‑turystyčny centr z dehustacyjnaj załaj, zakupić dubovyja bočki i vytrymlivać u ich vino, prymać turystaŭ i znajomić ich z historyjaj i technałohijaj vinarobstva.
Ciuškievič ukazaŭ na niaznačnuju dolu spažyvańnia vinahradnych vin u Biełarusi: u Minsku spažyvajecca 220 hramaŭ na čałavieka ŭ miesiac, u Hrodzienskaj vobłaści — 140, u Minskaj i Homielskaj — kala 200 hramaŭ. U cełym pa krainie ŭ hod spažyvajecca 40 młn. plašak vinahradnaha vina. Pradstaŭnik kampanii ličyć nieabchodnym pavialičvać u Biełarusi kulturu pićcia, pastupova źnižać spažyvańnie harełki i pładova‑iahadnych vin i pavialičvać vytvorčaść vinahradnych.