Bieatyfikavany kapiełan «Salidarnaści» Ježy Papiałuška
6 červienia ŭ Varšavie adbyłasia ŭračystaja cyrymonija bieatyfikacyi ksiandza Ježy Papiałuški. Śviatar, jakoha nazyvali «kapiełanam «Salidarnaści», byŭ zakatavany kamunistyčnymi śpiecsłužbami ŭ kastryčniku 1984 hoda.
Ksiondz Ježy Papiałuška padtrymlivaŭ apazicyju, čym moh. Fota z pl.wikipedia.org.
Udziačnyja palaki dabilisia bieatyfikacyi śviatara. Fota PAP.
Na cyrymoniju ŭ Varšavie sabrałasia 250 tysiač viernikaŭ. Fota PAP.
Na Imšu, jakaja prachodziła na płoščy Piłsudskaha ŭ polskaj stalicy, sabrałasia bolš za 250 tysiačaŭ čałaviek. Paśla zakančeńnia nabaženstva vierniki rušyli pracesijaj da kaścioła Božaha Providu, niesučy z saboj abraz i relikvii ks. Papiałuški. «Niachaj jaho prykład i zastupnictva ŭzdymaje starannaść śviataroŭ i raspalvaje luboŭ viernikaŭ», — takija słovy z nahody ŭšanavańnia ksiandza i nacyjanalnaha hieroja pramoviŭ Papa Bieniedykt XVI.
Naradziŭsia Ježy Papiałuška 14 vieraśnia 1947 hoda ŭ vioscy Akopy na Biełastoččynie. Jaho baćki byli prostymi sialanami. U siamji šanavałasia pamiać dziadźki, jaki zmahaŭsia ŭ šerahach Armii Krajovaj dy zahinuŭ ad ruk kamunistaŭ. Z malenstva Ježy adznačaŭsia hłybokaj relihijnaściu. Školnaje kiraŭnictva nieadnojčy rabiła z hetaj nahody zaŭvahi jahonym baćkam.
U 1972 hodzie jon staŭ ksiandzom. Za časami śviatarskaha słužeńnia ŭ ks. Papiałuški skłalisia dobryja stasunki z udzielnikami antykamunistyčnaha ruchu.
Ksiondz nikoli nie anhažavaŭsia naŭprost u dziejnaść supracivu, adnak zaŭsiody padtrymlivaŭ patryjotaŭ duchoŭna. Kali ŭ 1981 hoda ruch «Salidarnaści» staŭ nabirać moc, ks. Papiałuška słužyŭ nabaženstvy na achoplenych strajkami varšaŭskich pradpryjemstvach. Paśla ŭviadzieńnia ŭ śniežni taho ž hodu vajennaha stanovišča ks. Ježy staŭ pravodzić u varšaŭskim kaściole sv. Stanisłava Kostki Imšu za Ajčynu.
«Nie dazvol pieramahčy złu, ale pieramahaj zło dabrom», — hetaja cytata ź lista Apostała Paŭła da rymlanaŭ stała devizam dla śviatara. Jon byŭ pierakananym prychilnikam niehvałtoŭnaha supracivu. U svaich kazańniach ks. Papiałuška śmieła i adkryta kazaŭ pra zahany aŭtarytarnaj ułady, ale adnačasova pieraścierahaŭ ludziej ad taho, kab jany adkazvali režymu jaho ž mietadami. Udzielniki supracivu nazyvali ksiandza Papiałušku «kapiełanam «Salidarnaści», choć nichto aficyjna nie nadavaŭ jamu taki tytuł.
Režym nie moh daravać ks. Papiałušku jahonyja propaviedzi i jahonuju salidarnaść ź pieraśledavanymi. Na ksiandza zaviali kryminalnuju spravu, za jakuju jamu pahražali dziesiać hod turmy. Padčas pieratrusu ŭ jahonym domie była «znojdziena» zbroja, što stała padstavaj dla prapahandysckaj kampanii ŭ srodkach masavaj infarmacyi.Za ksiandzom sačyli, suprać jaho ładzili pravakacyi, dasyłali listy z pahrozami.
Kali stała zrazumieła, što nijakija mietady cisku nie spracoŭvajuć, raźjušanyja śpiecsłužby pryniali rašeńnie zabić ks. Papiałušku.
Uviečary 19 kastryčnika 1984 hoda jaho mašynu spynili kala Toruni dva supracoŭniki Słužby biaśpieki, pieraapranutyja ŭ formu darožnaj milicyi. Ksiandza schapili, źviazali i kinuli z mosta ŭ Visłu. Cieła śviatara było znojdziena ŭ race tolki praź dziesiać dzion.Ad taho času ksiondz Ježy Papiałuška staŭ lehiendaj.