12 tysiač katalikoŭ prajšli pracesijaj u centry Minska

Šeście Božaha cieła spuściłasia ad Załatoj Horki praśpiektam da płoščy Niezaležnaści, a paśla ad Čyrvonaha kaścioła da Katedry.

Prykładna 12 tysiač katalikoŭ, pradstaŭnikoŭ 15 staličnych hramadaŭ rymska-katalickaj i hreka-katalickaj cerkvaŭ, stali ŭdzielnikami eŭcharystyčnaha šeścia ŭ honar uračystaści Najśviaciejšaha Cieła i Kryvi Pana, arhanizavanaha 6 červienia pa centralnych vulicach Minska.

Pracesija Božaha Cieła ŭ Minsku, 6 červienia.

Pracesija Božaha Cieła ŭ Minsku, 6 červienia.

Pracesija Božaha Cieła ŭ Minsku, 6 červienia.

Pad kiraŭnictvam mitrapalita Kandrusieviča kaścioł u Biełarusi idzie da ludziej.

Jak paviedamiŭ pres-sakratarRymska-katalickaj carkvy ŭ Biełarusi ksiondz Alaksandr Amialčenia, u pracesii ŭdzielničali dzieci sa staličnych parafij, jakija sioleta pryniali pieršuju śviatuju kamuniju, pradstaŭniki roznych malitoŭnych hrup i ruchaŭ, śviatary.

Šeście, adznačyŭ ksiondz Alaksandr, źjaŭlajecca śviedčańniem prysutnaści Boha nie tolki dla viernikaŭ, ale i dla prachožych — minčan i haściej horada. Pavodle jaho słoŭ, adna z zadač arhanizataraŭ pracesii jakraz i zaklučajecca ŭ tym, «kab niavierniki chacia b na imhnieńnie zadumalisia ab prysutnaści Boha». «Akramia taho, my chočam pakazać, što kataliki isnujuć u krainie i składajuć peŭnuju, davoli značnuju častku biełaruskaha hramadstva», — padkreśliŭ ksiondz Alaksandr. Jon dadaŭ, što z kožnym hodam uzrastaje kolkaść udzielnikaŭ šeścia, jakoje dazvalaje viernikam publična demanstravać svajo vieravyznańnie.

Pavodle tradycyi ŭračystaść pačałasia ŭ 9.00 śviatoj imšoj kala kaścioła Najśviaciejšaj Trojcy na Załatoj Horcy. Zatym udzielniki šeścia na čale z arcybiskupam mitrapalitam Minska-Mahiloŭskim Tadevušam Kandrusievičam i apostalskim vizitataram dla hreka-katalikoŭ Biełarusi archimandrytam Siarhiejem Hajekam prajšli pa tratuary praśpiekta Niezaležnaści, vulicach Biersana, Vaładarskaha, Internacyjanalnaja i zaviaršyli akcyju kala archikafiedralnaha kaścioła imia Najśviaciejšaj Panny Maryi.

Pracesija z kalarovymi stužkami, charuhvami, abrazami i manstrancyjaj z najśviaciejšym sakramentam spyniałasia na płoščy Pieramohi, dzie adbyłasia malitva ŭ honar 65-hodździa pieramohi ŭ Vialikaj Ajčynnaj vajnie, a taksama na Kastryčnickaj płoščy, płoščach Niezaležnaści i Svabody. Padčas prypynkaŭ śviatary čytali ŭryŭki ź Jevanhiella, pramaŭlali hamilii na aktualnyja prablemy duchoŭnaha, maralnaha i hramadskaha žyćcia, dobrasłaŭlali viernikaŭ najśviaciejšym sakramentam.

Pierad apošnim dobrasłavieńniem vierniki vykanali himn Te Deum («Ciabie, Boha, prasłaŭlajem»), a ŭ zaklučeńnie ŭračystaści — duchoŭny himn «Mahutny Boža».

Kamientary da artykuła