Adnastajnaja raznastajnaść

Repartaž ź Fiestyvalu nacyjanalnych kultur, jaki prajšoŭ u Hrodna 4-6 červienia.

4–6 červienia ŭ Hrodna prajšoŭ respublikanski Fiestyval nacyjanalnych kultur. Hetaje śviata, jakoje ładzicca raz na dva hady, horad nad Niomanam sustrakaŭ užo vośmy raz.

Nasupierak čakańniam vialikaj častki haradziencaŭ, sioletni fiestyval mała adroźnivaŭsia ad papiarednich. Adkryćcio ŭ pieršy dzień na stadyjonie, na nastupny — nacyjanalnyja padvorki pa ŭsioj centralnaj častcy horada, a na zaviaršeńnie — śviata nacyjanalnaj kuchni. Ale ab usim pa paradku.

Davyd Haradzienski i Aleh Hazmanaŭ

Honar adkryć Fiestyval vypaŭ Siamionu Šapira — novamu kiraŭniku Hrodzienskaj vobłaści. Razam ź ministram kultury P.Łatuškam, kiraŭnikom hrodzienskaha vykankama Barysam Kaziałkovym i inšymi aficyjnymi asobami jon ŭračysta adkryŭ Fiestyval na hrodzienskim stadyjonie. U aficyjnych pramovach nie abyšłosia biez dublavańnia niadaŭniaha vykazvańnia A.Łukašenki ab adsutnaści ŭ Biełarusi nacyjanalnych mienšaściaŭ, paśla jakich raspačałasia teatralizavanaja cyrymonija. U joj režysior U.Siarhiejčyk zdoleŭ sumiaścić niesumiaščalnaje — Davyda Haradzienskaha na hazonie stadyjona zamianiali partyzany, savieckija sałdaty i vializnaja čyrvonaja zorka, a ich — dzieci ŭ śvietłych bałachonach. Paśla ŭsiaho hetaha na stadyjonie źjaviŭsia hałoŭny numar prahramy pieršaha dnia Fiestyvalu — Aleh Hazmanaŭ. Jon nie vielmi razumieŭ, dzie znachodzicca (błytaŭsia ŭ naźvie śviata), ale zatoje spraŭna padskokvaŭ, adžymaŭsia i kruciŭ salta. Supracoŭnikam hrodzienskich pradpryjemstvaŭ, siarod jakich biaspłatna raspaŭsiudžvali zaprašalniki na cyrymoniju adkryćcia, kancert Hazmanava i śviatočny salut, jaki vybuchnuŭ adrazu pa im, spadabalisia.

Tyja žychary Hrodna, što na stadyjon nie trapili, zadavolvalisia kancertam na Savieckaj płoščy dy tranślacyjaj sa stadyjona. Admysłova dla ich arhanizatary fiestyvalu zładzili jašče adzin fiejervierk.

«Dzievačkam taksama nalicie»

5 červienia na fiestyvali było zapłanavana pradstaŭleńnie nacyjanalnych padvorkaŭ — mienavita tut pradstaŭniki nacyjanalnaściaŭ, što žyvuć u Biełarusi, pavinny byli demanstravać asablivaści svaich kultur. Sioleta ŭ Hrodna takich padvorkaŭ paŭstała 26 i tamu aficyjnaja delehacyja padzialiłasia na dźvie častki — adnu ź ich uznačaliŭ S.Šapira, a druhuju — P.Łatuška.

Novy kiraŭnik hrodzienskaj vobłaści ad samaha pačatku pryciahvaŭ vialikuju ŭvahu žurnalistaŭ i naviednikaŭ fiestyvalu. Usie pamiatali kuraž, ź jakim adznačaŭ hetaje śviata jaho papiarednik — Uładzimir Saŭčanka. Šapira pačaŭ abychod padvorkaŭ ź biełaruskaha i napačatku byŭ strymany ŭ pavodzinach, adnak užo na polskim padvorku jon puściŭsia ŭ nastalhičnyja razvahi ab tym, što naviedvaŭ siaredniuju škołu dziela pončykaŭ, jakija jamu vielmi padabalisia (akurat pončykami pačastavali S.Šapiru siabry aficyjnaha SPB. Siabry nieaficyjnaha zvykła śviatkavali asobna, nie čakajučy aficyjnych asobaŭ). A kali delehacyja na čale z kiraŭnikom vobłaści dabrałasia da ukrainskaha padvorka, to novy hubiernatar pajšoŭ u narod i pačaŭ uzdymać čarku z haradžanami, uładarna zahadvajučy: «dzievačkam taksama nalicie».

Hałandskaja «Sex bomb»

Nie adstavaŭ ad spadara Šapiry i P.Łatuška. Na azierbajdžanskim padvorku jon navat uźniaŭ tost za žurnalistaŭ. Ministr kultury, što praŭda pry hetym paśpiavaŭ rabić pramovy i ŭručać simvaličnyja klučy ad Biełarusi.

Tłumy šarahovych hramadzian tym časam užo śviatkavali napoŭnicu pierachodziačy z padvorka na padvorak. Ź ich, hetych impravizavanych vyspaŭ raznastajnych kultur, asabliva vydzialaŭsia hałandski. Choć hałandcy ŭ Hrodna pryjechali nie z-pad Homiela ci Radaškovič, a z Raterdama i Amsterdama, hrodziencam jany zapomniacca nadoŭha. U toj čas, jak bolšaść nacyjanalnaściaŭ tańčyła pad svaje narodnyja pieśni, hałandcy adryvalisia pad «Sex bomb», razmachvajučy aranžavymi ściahami dy demanstrujučy najlepšyja ŭzory sučasnaj haradskoj artystyčnaj kultury Zachadu. Hetki kavałak Niderłandaŭ asabliva spadabaŭsia moładzi, sabraŭšy vakoł siabie ščylny natoŭp.

Na inšych padvorkach usio było jak zvyčajna — kitajskija baloniki i tannyja cacki, rasijskaje i biełaruskaje piva, šašłyki dy dziaŭčynki ŭ strakatych nacyjanalnych kaściumach. Kali b nie šyldy dy nacyjanalnyja ściahi, adroźnivać padvorki było b składana.

Zaviaršaŭsia vośmy respublikanski Fiestyval nacyjanalnych kultur śviatam kuchni roznych narodaŭ i tradycyjnym Horadam majstroŭ, dzie raznastajnyja ŭmielcy z usioj Biełarusi mieli mahčymaść pradać svaje vyraby dy demanstracyjaj uzoraŭ nacyjanalnaha chareahrafičnaha mastactva.

Vidoviščy za košt chleba

Try dni Fiestyvalu kaštavali kala miljarda rubloŭ. Na pres-kanfierencyi, jakaja adbyłasia pierad jaho pačatkam, kiraŭnictva Hrodna zapeŭnivała žurnalistaŭ, što na 65% Fiestyval z ułasnaj inicyjatyvy prafinansavali pradpryjemstvy Hrodna i rehijona. Vierycca ŭ takuju ščodraść ź ciažkaściu. Tym bolš, što vobłaść jašče čakajuć lidskija dažynki, na jakija taksama pryjdziecca skidvacca.

Haradziency ab finansavańni śviata z ułasnaj kišeni nie dumajuć. Fiestyval nacyjanalnych kultur dla ich ci nie adzinaja jaskravaja padzieja ŭ žyćci hetaha zachodniaha abłasnoha centra, jakaja pryciahvaje ŭvahu va ŭsioj krainie. Tamu navat hrodzienskija kamunalniki ŭ fiestyvalnyja dni chadzili pa horadzie ŭ naviutkich aranžavych kamizelkach, pavialičvajučy tym samym hałandskuju prysutnaść u Hrodnie. Nia kažučy ŭžo pra bialutkija kašuli milicyjanieraŭ. Što praŭda, nia ŭsie žychary Hrodna zadavolenyja takimi vydatkami. Adnak dla bolšaści ź ich staroje rymskaje praviła pra chleb i vidoviščy vydatna pracuje i siońnia. Ludziam chočacca śviata. A toje, što jano stanovicca ŭsio bolš adnastajnym, pavialičvajučy adno kolkaść ŭdzielnikaŭ, nie maje vyrašalnaha značeńnia.

Hladzicie taksama fotarepartažy Julii Daraškievič Repartaž z adkryćcia Fiestyvalu nacyjanalnych kultur i Jak u Hrodnie sustrakali novaha hubiernatara.

Kamientary da artykuła