U Minsku adkryjecca pieršy pryvatny artkinateatr Rubin Plaza
Pieršy ŭ Minsku pryvatny artkinateatr Rubin Plaza z 3D‑załaj adkryjecca hetym letam, paviedamiŭ pijar‑mieniedžer prajekta Viktar Paźniakoŭ.
Pavodle jaho słoŭ, kinateatr premium‑kłasa Rubin Plaza adkryjecca ŭ adnajmiennym handlova‑zabaŭlalnym centry (prt-t Dziaržynskaha, 5 -- «NN»). Pieršy ŭ biełaruskaj stalicy pryvatny artkinateatr budzie składacca ź dźviuch ličbavych załaŭ: na 94 i 54 miescy. U pieršaj zale buduć demanstravacca najnoŭšyja suśvietnyja premjery ŭ farmacie 3D. Druhaja zała budzie aryjentavana na artchaus i tematyčnyja prahramy.
Pakazy ŭ artkinateatry buduć prachodzić kruhłasutačna. U Rubin Plaza raźmieścicca kinabar, u jakim upieršyniu ŭ Minsku buduć pradavać papkorn i cukrovuju vatu. Ceny biletaŭ na sieansy buduć varjiravacca ad 3 da 35 tys. rubloŭ u zaležnaści ad dnia tydnia, času sutak i technałohii pakazu. Praduhledžany źnižki dla studentaŭ, školnikaŭ, piensijanieraŭ, invalidaŭ, šmatdzietnych siemjaŭ.
«Vidavočny dysbałans pamiž ahulnym raźvićciom Minska jak sučasnaj stalicy i ŭzroŭniem raźvićcia kinapakazu ŭ horadzie, — zajaviŭ dyrektar artkinateatra Rubin Plaza Alaksandr Mikałajčuk. — Mnohija minčanie marać pra kinateatr jeŭrapiejskaha ŭzroŭniu z 3D‑załaj, niestandartnym repiertuaram i raźvitaj infrastrukturaj. Hetu kalektyŭnuju maru my imkniemsia ŭvasobić u žyćcio ŭ Rubin Plaza».
U chole artkinateatra raźmieścicca pab, u jakim pa viečarach buduć prachodzić muzyčnyja i zabaŭlalnyja prahramy. U artkinateatry praduhledžany VIP‑karty, jakija zabiaśpiečać dostup na lubyja sieansy biez čarhi.
Data adkryćcia artkinateatra budzie vyznačana paźniej. U budynku zaviaršajucca budaŭničyja i adździełačnyja raboty. Repiertuar užo farmirujecca — dniami kiraŭnictva artkinateatra Rubin Plaza adpraviłasia na mižnarodny kinarynak u Sočy. Tam budzie zakupleny šerah čakanych premjer dla prakatu ŭ Rubin Plaza jak u 3D, tak i ŭ dvuchmiernym farmacie.