Pad Brestam pjany inśpiektar DAI raźjechaŭ ravarysta

I pakinuŭ pamirać na miescy avaryi.

Bolš za toje, milicyjant kinuŭ 17-hadovaha chłopca pamirać i pasprabavaŭ schavacca ź miesca zdareńnia.

Raspačataja kryminalnaja sprava ŭ dačynieńni da inśpiektara DPS DAI UUS Bresckaha abłvykankama, jaki, siedziačy pjany za rulom aŭtamabila, źbiŭ naśmierć 17-hadovaha chłopca.

Darožna-transpartnaje zdareńnie adbyłosia ŭnačy 27 červienia. Inśpiektar DPS DAI UUS Bresckaha abłvykankama staršy lejtenant Fiodar Aniśkievič jechaŭ na aŭtamašynie «Aŭdzi», jakaja naležyć jaho siabroŭcy. Inśpiektar DPS, jaki pavinien sačyć, kab kiroŭcy nie parušali praviły darožnaha ruchu i nie sadzilisia za styrno padpitymi, sam byŭ dobra napadpitku.

U jaho kryvi paźniej znajšli 1,1 pramile ałkaholu.

Niedaloka ad vioski Ščehliki Žabinkaŭskaha rajona jon źbiŭ 17-hadovaha chłopca, jaki jechaŭ na rovary.

Chłopiec praviłaŭ nie parušaŭ i da taho ž byŭ paznačany śvietłaadbivalnymi elemientami, ale heta jaho nie vyratavała.

Jak rastłumačyli ŭ prakuratury Bresckaj vobłaści, pa fakcie DTZ sa śmiarotnym zychodam u dačynieńni da inśpiektara DPS DAI raspačatyja dźvie kryminalnyja spravy — pa č. 2 art.317 (parušeńnie praviłaŭ darožnaha ruchu abo ekspłuatacyi transpartnych srodkaŭ, jakoje paciahnuła pa nieaściarožnaści śmierć čałavieka) i pa č.3 art.159 (naŭmysnaje pakidańnie ŭ niebiaśpiecy, ździejśnienaje asobaj, jakaja sama pa nieaściarožnaści ci z uskosnym namieram pastaviła paciarpiełaha ŭ niebiaśpiečnaje dla žyćcia abo zdaroŭja stanovišča). Rasśledavańnie pravodzić UUS Bresckaha abłvykankama.

Kamientary da artykuła