Salihorski «Šachcior» vyjšaŭ na 2-je miesca ŭ čempijanacie Biełarusi

U niadzielu prajšli matčy 19-ha turu čempijanatu Biełarusi pa futbole ŭ vyšejšaj lizie. Centralny matč prajšoŭ u minskaj Kuncaŭščynie, dzie sustrakalisia kamandy, što zajmajuć 2 i 3-ja miescy ŭ čempijanacie.

Salihorski kłub atrymaŭ haściavuju pieramohu 1:0, pry samym kancy pieršaha tajmu (na 2-j dadzienaj chvilinie) vyznačyŭsia Maksim Hukajła.

Znoŭ taki ni ŭ asnoŭnym składzie, ni siarod zapasnych nie znajšłosia miesca dvum hałoŭnym hulcam minčanam — Siarhieju Kiślaku i Antonu Puciłu, jakija kanfliktujuć z kiraŭnictvam kłuba. Kiślak, prykładam, admoviŭsia pierachodzić u kamandu rasijskaj pieršaj lihi «Krasnadar».

Siońnia trybuny ciaham usiaho matču pastajanna skandziravali «Siery Kisły», «Anton Puciła», nu i «Čyž — m…». Niekalki dziasiatkaŭ zaŭziataraŭ pryjšli ŭ majkach z proźviščam Kiślaka na śpinie, u tym liku i samarobnych.

Darečy, zakłapočanaść situacyjaj vakoł Kiślaka i Puciły navat vykazaŭ niekalki dzion tamu hałoŭny trenier zbornaj Biernd Štanhie.

«Šachcior» źmiaściŭ «Dynama» z 2-ha miesca.

Inšyja vyniki: «Nioman» — «Minsk» — 0:1, «Viciebsk» — «Dynama» Brest — 0:1, «Naftan» — «Biełšyna» — 4:0, «Partyzan» — «Tarpieda» — 2:3, «Dniapro» — BATE — 0:2.

Stanovišča paśla 19-ci turaŭ:

BATE — 42, Šachcior — 37, Dynama Minsk, FK «Minsk» — 36, Biełšyna — 28, Dynama Brest — 27, Dniapro — 22, Naftan — 20, Viciebsk — 18, Nioman — 15, Tarpieda- 13, Partyzan — 11.

Aproč taho, «Tarpieda» i «Naftan» praviali na matč mieniej, hulnia miž imi 4 lipienia była admieniena praź vialikuju zalevu ŭ Žodzinie.

Matčy 20-ha turu — usiaho ŭ pieršynstvie maje być zhulana 33 tury — projduć 31 lipienia — 1 žniŭnia. Praŭda, hvozd prykancatydnia BATE — «Dynama» pieraniesieny na 22 vieraśnia. Kamandy zaniatyja ŭ jeŭrakubkach.

Kamientary da artykuła