Z pačatku hoda na darohach Biełarusi zahinuła 19 dziaciej

Z pačatku 2010 hoda na darohach Biełarusi zahinuła 19 dziaciej, 318 — atrymali traŭmy.

Pavodle danych DAI, u paraŭnańni z anałahičnym pieryjadam minułaha hoda kolkaść zahinułych skaraciłasia na piać čałaviek, traŭmavanych — na 69.

U studzieni-lipieni hetaha hoda zarehistravana 285 DTZ z udziełam dziaciej — na 17% mienš, čym za taki ž pieryjad minułaha.

Suško paraiŭ baćkam znachodzić najbolš biaśpiečnyja maršruty, kab advozić dziaciej da navučalnych ustanoŭ, a taksama nie zabyvać zabiaśpiečvać ich śviatłoadbiŭnymi elemientami.

Staršy inśpiektar upraŭleńnia Dziaržaŭtainśpiekcyi MUS Biełarusi Stanisłaŭ Sałaviej paviedamiŭ, što z 23 žniŭnia pa 8 vieraśnia ŭ krainie projdzie kompleksnaje mierapryjemstva «Uvaha, dzieci!».

«U ramkach hetaha mierapryjemstva my realizujem mnostva akcyj, siarod jakich — „Biaśpiečny pierachod“: na piešachodnych pierachodach buduć dziažuryć ludzi z tabličkami „STOP“, taksama budziem pryciahvać da dziažurstvaŭ samich školnikaŭ», — raskazaŭ Sałaviej.

Jon zaklikaŭ aŭtamabilistaŭ u pieryjad dziejańnia mierapryjemstva jeździć z uklučanym bližnim śviatłom far.

U svaju čarhu Ministerstva adukacyi pavysiła ŭvahu da prablemy biaśpiečnych pavodzin na darohach, paviedamiŭ hałoŭny inśpiektar upraŭleńnia ahulnaj siaredniaj adukacyi Minadukacyi Uładzimir Paddubski.

«Z 2010 hoda, — zaznačyŭ jon, — pavialičvajecca kolkaść hadzin kursu „Asnovy biaśpieki žyćciadziejnaści“, jaki vyvučajecca ŭ škołach u 2-9-ch kłasach. Taksama ŭ školnych ustanovach realizujecca adukacyjnaja prahrama „Praleska“, u dziciačych sadkach jość „haradki“, dzie možna treniravać dziaciej, jak pavodzić siabie na darozie».

Paddubski dadaŭ, što ŭ hetym hodzie dla vučniaŭ 5-6-ch kłasaŭ dabaŭleny fakultatyŭny kurs «Biaśpiečny viełasipiedyst» (pryncypy biaśpiečnaha vadžeńnia i pavodzin na darohach u sielskich i haradskich umovach), dla starejšych kłasaŭ rychtujecca anałahičny kurs zaniatkaŭ «Matacyklist».

Ciapier, dadaŭ hałoŭny inśpiektar, pa daručeńni Savieta ministra pry sadziejańni DAI i mnohich ministerstvaŭ raspracoŭvajecca kompleksnaja prahrama pa biaśpiecy na darohach na 2011–2015 hady.

Kamientary da artykuła