Paety na videa
Zachavać paetaŭ dla historyi vyrašyli ŭ biełaruskim siektary sieciva
Zachavać paetaŭ dla historyi vyrašyli ŭ biełaruskim siecivie. Raz na tydzień na sajtach «Budźma biełarusami!» i «Litradyjo» u ramkach videaprajektu «Čorna-biełyja vieršy» pakazvajuć adnaho paeta, jaki na ŭłasny vybar čytaje adzin vierš.
Viktar Žybul čytaje vierš «Sieniehał»
— Ideja — zrabić zrez sučasnaj paezii biez maderavańnia, tematyčnych i leksičnych abmiežavańniaŭ, — kaža pradusar prajekta, piśmieńnik i žurnalist Pavał Ancipaŭ. — Čamu ŭ čorna-biełym farmacie? My chočam, kab našyja roliki ŭjechali ŭ litaraturnaje žyćcio jak u žyćcio čałavieka ŭvajšli karotkija stužki bratoŭ Lumjer.
Siarod pieršych udzielnikaŭ prajektu — Andrej Adamovič, Nasta Mancevič, Vital Ryžkoŭ, Anton Rudak, Asia Vołkava. Papiaredniuju zhodu na ŭdzieł u prajekcie dali Uładzimir Arłoŭ, Andrej Chadanovič, Džeci, Juhasia Kalada, Leanid Drańko-Majsiuk, a taksama rasijskamoŭnyja paety Kaciaryna Zykava i Dźmitry Strocaŭ. Z mnohimi paetami viaducca pieramovy. Arhanizatary prajekta kažuć, što chacieli b bačyć siarod udzielnikaŭ prajekta taksama i žyvych kłasikaŭ: Alesia Razanava i Ryhora Baradulina.
— Źniali moj studyjny vystup z dvuch dublaŭ — słova niapravilna skazaŭ, — dzielicca ŭražańniami ad zdymkaŭ pieršy ŭdzielnik prajektu «Čorna-biełyja vieršy» paet Viktar Žybul. — Padčas čytańnia ŭ kamieru krychu biantežyła małaja prastora i adsutnaść publiki, ale papracavać u žanry kamiernaha videa było jak minimum cikava.
Darečy, imiony ŭlublonych paetaŭ, jakich vy žadali b bačyć u «Čorna-biełych vieršach», dasyłajcie na adras razam@budzma.org z paznakaj «vieršy».