Biełaruś na paŭhoda ŭvodzić abmiežavańni na ekspart rapsavaha aleju ŭ ES

Jak paviedamiŭ na pres-kanfierencyi 13 vieraśnia ŭ Minsku staršynia kancerna «Biełdziaržcharčpram» Ivan Dančanka, takoje rašeńnie pryniata ŭ suviazi z tym, što «sioleta nazirajecca nievialiki deficyt nasieńnia rapsu — prykładna 30 tysiač ton». Raniej Biełaruś ekspartavała ŭ krainy Jeŭropy, u tym liku krainy Bałtyi, da 50 tys. ton aleju.

Staršynia kancerna adznačyŭ, što ŭ Biełarusi rapsavy alej vypuskajecca nie tolki dla charčovych met, ale i dla vyrabu bijapaliva. «Vyroščvajučy nasieńnie rapsu, sialanie zabiaśpiečvajuć enierhietyčnuju biaśpieku krainy, źnižajučy zaležnaść ad impartu», — ličyć Dančanka.

Razam z tym jon padkreśliŭ, što pradpryjemstvy kancerna «Biełnaftachim» majuć mahčymaść całkam zabiaśpiečvać patrebnaści rynku ŭ bijadyzielnym palivie i «stvarajuć mahutny ekspartny patencyjał». Pavodle słoŭ Dančanki, Biełaruś ciapier budzie ŭ poŭnym abjomie pierapracoŭvać rapsavy alej dla vytvorčaści bijapaliva.

Jak rastłumačyli BiełaPAN u pres-słužbie kancerna «Biełdziaržcharčpram», u najbližejšyja dva-try miesiacy ekspart rapsavaha aleju budzie naohuł spynieny. U dalejšym budzie razhladacca pytańnie ekspartu ŭ abmiežavanaj kolkaści ŭ zaležnaści ad zajavak vytvorcaŭ.

Kamientary da artykuła