Alternatyŭny kalandar dla Pucina
U im studentki nie ahalajucca, zatoje staviać pytańni.
U Siecivie źjaviŭsia alternatyŭny kalandar u padarunak premjer-ministru Rasii Uładzimiru Pucinu, jakomu 7 kastryčnika spaŭniajecca 58 hadoŭ. Jon pavinien stać adkazam na apublikavanyja napiaredadni ilustracyi padarunkavaha kalendara, na jakich dziaŭčaty z fakulteta žurnalistyki MDU im. M.V. Łamanosava pazujuć u bialiźnie i pryznajucca ŭ kachańni da Pucina.
Alternatyŭny kalandar zrobleny na kantraście. Na jahonych staronkach taksama studentki žurfaku MDU, ale nie aholenyja i nie ŭ zazyŭnych pozach, a ŭ čornych sukienkach ci palito i z zaleplenymi skotčam vusnami. Dziaŭčaty adrasavali premjeru ŭ dzień jaho naradžeńnia pa adnym pytańni, kožnaje ź jakich pa-svojmu niepryjemnaje i niazručnaje dla kiraŭnika ŭrada.
Tak, adna z studentak pytajecca: «Kali vyzvalać Chadarkoŭskaha?», Inšaja — «Jak inflacyja paŭpłyvaje na chabary?», A treciaja — «Chto zabiŭ Hannu Palitkoŭskuju?»
Adznačym taksama, što čaćvier 7 kastryčnika — nie tolki dzień naradžeńnia Pucina, ale i dzień hibieli ahladalnicy «Novoj haziety» Hanny Palitkoŭskaj. Da jaje doma na Lasnoj vulicy, 8 u Maskvie niasuć kvietki, a kala stancyi mietro «Čystyja prudy» projdzie mitynh u pamiać ab joj. Napiaredadni stała viadoma ab novych padazravanych u spravie zabojstva žurnalistki.
Jašče dźvie dziaŭčyny źviartajucca da Pucina z takimi ž rytaryčnymi pytańniami: «Durni dobra, ale darohi jak?» I «Svabodu schodaŭ zaŭsiody i ŭsiudy?» A na apošniaj ilustracyi treciakurśnica fakulteta zadaje, mabyć, najbolš pravakacyjny pytańnie: «Kali nastupny terakt?»
Fotazdymki vykłała ŭ svaim błohu adna z udzielnic prajekta pad nikam liz-anderson. «Paśla vychadu ŭčorašniaha kalendara kampanija dziaŭčat z žurfaku MDU im. Łamanosava nie mahła nie padrychtavać svajho adkazu. U nas nabrałasia niekalki pytańniaŭ ... My zadali ich. Kalandar raju razdrukavać i pačapić na ścianu. Sumlennaje imia fakulteta my hańbić nie damo», — prakamientavała jana alternatyŭny kalandar.
Varta adznačyć, što miarkujučy pa kamientarach da fatahrafij, novaja viersija padarunku dla premjera była sustretaja z bolšaj uchvałaj, čym eratyčnaja z pašłavatymi zvarotami da Pucina: «Uładzimir Uładzimiravič, lasy pahasili, a ja ŭsio jašče haru!», «Prakacicca na Kalinie» , «Usim by takoha mužčynu» abo «Jak nakont treciaha razu?».
U internecie studenty i vypuskniki žurfaku pačali aktyŭna abmiarkoŭvać pytańnie ab reputacyjnaj škodzie, naniesienaj fakultetu. «Nie chaciełasia b, kab nas z hetym asacyjavali», — pišuć studentki ŭ Twitter. «Pahladzieła na studentak žurfaku. Zachaciełasia napisać list prezidentu žurfaku: «Sp. Zasurski, adličycie hetych idyjotak z našaha fakultetu», — adhukajucca ŭ inšym mikrabłohu. Adna z vypusknic fakultetu piša: «Pajdu, spalu dypłom». «Što jašče vyčvaryć załataja moładź našaha fakultetu? Navat nie viedaju, płakać ci śmiajacca», — cytuje dopis inšaha błohiera «Interfaks».
Kiraŭnictva žurfaku aburanaje publikacyjaj eratyčnaha kalendara
Na samym fakultecie taksama byli aburanyja tym, što aŭtary prajekta vykarystoŭvali imia fakultetu, kab spravakavać bolšy rezanans i zarabić dadatkovy pijar. Pryčym aŭtary prajekta hety fakt nie chavajuć.
«My chacieli zrabić taki prajekt adnačasova Uładzimiru Uładzimiraviču na dzień naradžeńnia i jak pr-prajekt dla dziaŭčat. Ideja pijaru — u pavyšeńni miedyjnaści. Žurnalistyka taksama moža być roznaja — voś, naprykład, Lena Harnastajeva, jakaja zdymałasia dla kalendara, viadučaja Energy-FM. Ja dumaju, lišnimi 50-100 zhadak ŚMI nie budzie», — adkryta zajaviŭ Uładzimir Tabak, pradziusier prajekta.
Pa słovach dekana fakulteta Aleny Vartanavaj, dadzienaja PR-inicyjatyva ujaŭlajecca dziŭnaj. «Ja chaču skazać, što vielmi sumna, kali asabistyja ambicyi i asabistaja kapitalizacyja robiacca za košt vykarystańnia imia fakultetu. I ja nie padzialaju ich kaštoŭnaści, kali jany tak zdymajucca i pakazvajuć siabie ŭ takim vyhladzie na kalendary. Napeŭna, ničoha niama žudasnaha. Niepryjemna tolki što vykarystoŭvajecca imia fakultetu. Dvanaccać studentak składajuć nikčemna mały adsotak ad troch tysiač studentaŭ, što navučajucca ciapier u nas. Ja nie viedaju, jak heta moža paŭpłyvać na reputacyju».
Jašče bolš, pa jaje słovach, byŭ rasčaravany hanarovy prezident fakulteta Jasien Zasurski. «Mnie zdajecca, heta niadobrasumlenna, niadobra, jany nam nie paduładnyja. My nie možam skazać ničoha — jany ž užo dypłom atrymali. I zaraz vykinuli taki numar jak byccam by da dnia naradžeńnia Pucina. Moža być, jany atrymali hrošy za rekłamu bializny? Jany ž rekłamisty, im aby hrošy atrymać — ja bajusia, što jany mahli i heta zrabić. Viadoma, heta niepryjemna. Tamu što studenty, darosłyja, užo skončyli fakultet, nie znajšli ničoha lepšaha, jak zaniacca kamiercyjaj», — skazaŭ Zasurski.