U Minsk prybyŭ pasłańnik papy rymskaha kardynał Juzef Tamko

Viečaram 7 kastryčnika ŭ Minsk prybyŭ pasłańnik papy rymskaha Bieniedykta XVI kardynał Juzef Tamko, paviedamiŭ adkazny za ŚMI pry sakrataryjacie Kanfierencyi katalickich biskupaŭ u Biełarusi ajciec Alaksandr Ułas.

Pavodle jaho słoŭ, pantyfik pryznačyŭ byłoha prefiekta vatykanskaj Kanhrehacyi jevanhielizacyi narodaŭ kardynała Juzefa Tamko svaim pasłańnikam na śviatkavańni 300-hodździa aśviačeńnia minskaha archikafiedralnaha kaścioła Najśviaciejšaj Panny Maryi.

Uračystaja imša pad devizam Gaudium et spes («Radaść i nadzieja») pačniecca 9 kastryčnika ŭ 12.00, jana budzie mieć dušpastyrski charaktar i pravodzicca na łacinskaj i biełaruskaj movach. Ajciec Alaksandr zaznačyŭ, što pasłańnik papy (lehat) źjaŭlajecca pradstaŭnikom śviatoha ajca pry asobnych kaściołach, dziaržavach abo ŭradach.

Pavodle jaho słoŭ, kardynał Juzef Tamko vystupić z propaviedździu na biełaruskaj movie ŭ archikafiedralnym kaściole. Jon taksama płanuje sustrecca ź mitrapalitam Minskim i Słuckim Fiłaretam i pradstaŭnikami ŭłady, a 10 kastryčnika — uznačalić imšu ŭ maładziečanskim kaściole Śviatoha Jozefa (Minskaja vobłaść), dzie taksama budzie vystupać z propaviedździu pa-biełarusku.

Dla ŭdziełu va ŭračystaści zaprošany sotni haściej — pradstaŭniki dziaržaŭnych i hramadskich struktur, dypłamaty, ijerarchi i ksiandzy Rymska-katalickaj carkvy ŭ Biełarusi i zamiežža, mitrapalit Minski i Słucki Fiłaret, patryjaršy ekzarch usiaje Biełarusi. Padčas uračystaści ŭ śviatyni zapłanavana ŭstanoŭka dźviuch miemaryjalnych došak — u honar 300-hodździa aśviačeńnia chrama, a taksama ź imionami śviataroŭ, jakija słužyli ŭ kaściole z 1710 pa 1945 hady. Imša budzie tranślavacca na śviatłodyjodny ekran, jaki ŭstanoviać kala ŭvachodu ŭ śviatyniu.

***

Minski archikafiedralny kaścioł zasnavany jezuitami 31 lipienia 1700 hoda. 16 sakavika 1710 hoda chram aśviaciŭ biskup Vilenski Kanstanty Kazimir Bžastoŭski. 28 krasavika 1798 hoda śviatyni byŭ prysvojeny status kafiedralnaha kaścioła. Z krasavika 1905 hoda niejki čas jaho probaščam byŭ biełaruski ksiondz Zihmunt Łazinski. U paślavajenny čas chram byŭ adabrany ŭ viernikaŭ i pieradadzieny pad Dom fizkultury. U 1951 hodzie śviatynia była poŭnaściu razburana i pierabudavana. 9 śniežnia 1993 hoda pastanovaj biełaruskaha ŭrada budynak byŭ viernuty katolikam. Vialiki ŭniosak u restaŭracyju kaścioła zrabiŭ kardynał Kazimir Śviontak. 21 kastryčnika 1997 hoda chram byŭ paŭtorna ŭračysta aśviečany.

Kamientary da artykuła