Anšłah na viečarynie pamiaci Niny Maciaš
Haradskoj biblijatecy Biełaaziorsku nadadziena imia paetki.
Paetyčnyja čytańni pamiaci paetki Niny Maciaš «Babina leta ŭ Biełaaziorsku» 6 kastryčnika sabrała ŭ miascovym domie kultury paŭniutkuju zału.
«Pryjechali ludzi ź Minsku, z navakolnych haradoŭ, ź Biełastoku, ja ŭžo nie kažu, što skłałasia ŭražańnie, što na sustreču pryjšoŭ ci nie ŭsio miastečka», — raskazaŭ «Našaj Nivie» paet, daśledčyk litaratury Michaś Skobła. «Ja byŭ na troch litaraturnych čytańniach u Biełaaziorsku. Pieršyja dva — pry žyćci paetki. Hetym razam jana prysutničała mietafizična, pazirajučy na poŭnuju zału z ekrana», — raskazvaje paet. Pa jaho słovach, usie čytańni, jakija jon naviedaŭ u horadzie enierhietykaŭ, adbyvalisia pry poŭnym anšłahu.
Pa słovach spadara Skobły, da sioletnich čytańniaŭ miascovaja haradskaja biblijateka atrymała imia Niny Maciaš. Sami čytańni prachodziać dziakujučy namahańniam dyrektarki ŭstanovy Tamary Kuźniacovaj, jakaja namahajecca zrabić ich štohadovymi. Razhladajecca i data — 20 vieraśnia — dzień naradžeńnia paetki. «Heta ž samy čas babinaha leta».
Paet kaža, što miascovyja aktyvisty namahajucca źmieny nazvy vulicy, na jakoj žyła Nina Maciaš. «Vulica Lenina — adna z samych pryhožych u miastečku», — pryhadvaje sp. Skobła. Kvatera paetki naležyć jaje plamieńniku. Jon ź siamjoj maje ŭłasnaje žytło i nie suprać, kab u kvatery Maciaš raźmiaściŭsia litaraturny muziej. Adnak miascovyja ŭłady pakul što pryniali rašeńnie nakont biblijateki.
Pa jaho słovach, Nina Maciaš była maralnym aŭtarytetam nie tolki dla miascovych uładaŭ, alei dla kiraŭnictva vobłaści. Dziakujučy jaje namahańniam, premiju imia Uładzimira Kaleśnika stali atrymlivać nie tolki čalcy praŭładnaha piśmieńnickaha sajuza, ale i inšyja tvorcy. Jana i sama paśmiarotna atrymała hetuju premiju.
* * *
Nina Maciaš naradziłasia 20 vieraśnia 1943 h. u Nivach (siońnia Biarozaŭski r-n). Skončyła fakultet francuzskaj movy Minskaha dziaržaŭnaha piedahahičnaha instytuta zamiežnych moŭ (praz chvarobu musiła brać akademičny adpačynak). U 1973-1977 hh. vykładała niamieckuju movu ŭ Biełaaziorskaj prafiesijna-techničnaj navučalni. Člen SP SSSR (z 1971).
Debiutavała vieršam u 1962 h.. Aŭtarka niekalkich zbornikaŭ paezii «Ahoń», «Udziačnaść», «Ralla surovaja», «Pryručeńnie viasny», «Poŭny kielich» dy kazak «Dva braty i siakiera», «Kazka pra susiedziaŭ, źmiaju i miadźviedzia».
Pierakładała ź niamieckaj, polskaj, francuzskaj. Na biełaruskuju pierakłała tvory pra kamisara Miehre, a taksama «Maleńkaha prynca» Sent-Ekziupiery, navieły H. de Mapasana.
Pamierła 19 śniežnia 2008.