Chronika represij i supracivu za 31 kastryčnika - 5 listapada
31 kastryčnika kala sudu zatrymanyja moładzievyja aktyvisty Jaŭhien Skrabutan, Źmicier Chviedaruk, Klujeŭ. Ich zavieźli ŭ Maskoŭski RAUS, źniali adbitki palcaŭ, śfilmavali na videa i pierapisali pašpartnyja źviestki, a paśla adpuścili.
Sud Daškieviča
31 kastryčnika kala sudu zatrymanyja moładzievyja aktyvisty Jaŭhien Skrabutan, Źmicier Chviedaruk, Klujeŭ. Ich zavieźli ŭ Maskoŭski RAUS, źniali adbitki palcaŭ, śfilmavali na videa i pierapisali pašpartnyja źviestki, a paśla adpuścili. Padčas śviatkavańnia jubileju Biełdziaržuniversytetu ŭ Pałacy sportu 31 kastryčnika bajcy PMSN zatrymali studenta A.Mihuckaha z 30 ulotkami pra sud nad Daškievičam. 1 listapada abvieščany prysud Źmitru Daškieviču: 1,5 hodu kalonii ahulnaha režymu. U hety ž dzień na Kastryčnickaj płoščy ŭ Miensku adbyłasia akcyja «Vyzvalić Daškieviča», žorstka razahnanaja AMAPam: zatrymali Juliju Bałonkinu, Siarhieja Huminskaha, Alaksandru Janačku, Antona Lipienia, Darju Illinič, Alenu Ihnaćjevu, Z.Chviedaruka, Volhu Žuraŭlovu, Uładzimiera Siarhiejeva, Źmitra Jasieviča, Hleba Sandrasa, Kryścinu Šacikavu. Moładzievuju aktyvistku A.Janačku pry zatrymańni amonaviec, ź jaje słovaŭ, udaryŭ u tvar. 10 zatrymanych adpuścili z pastarunku. Zatrymanuju žurnalistku radyjo «Svaboda» Luboŭ Łuniovu vysadzili z aŭtobusa pa darozie ŭ pastarunak, la Opery. 2 listapada dvuch udzielnikaŭ akcyi asudzili: H.Sandras dastaŭ 2 bazavyja vieličyni štrafu, Z.Chviedaruk – 3 sutak aryštu. 2 listapada «Mižnarodnaja amnistyja» pryznała Daškieviča viaźniem sumleńnia.
Polskija spravy
31 kastryčnika milicyjanty ŭ cyvilnym marna sprabavali patrapić u pustuju kvateru Andžeja Lisoŭskaha, aktyvista niepryznanaha ŭładami Sajuzu palakaŭ u Biełarusi. Na Lisoŭskaha zaviali kryminalnuju spravu, abvinavaciŭšy ŭ kantrabandzie narkotykaŭ. 1 listapada aktyvista vyklikali na dopyt, a ŭ jahonaj kvatery zładzili pieratrus u pošukach narkotykaŭ i kanfiskavali vopratku. 2 listapada dopyt paŭtaryŭsia. Kiraŭničku Sajuzu palakaŭ Anžaliku Borys 2 listapada dapytali ŭ Haradzienskaj rehijanalnaj mytni śviedkaj u hetaj spravie. 4 listapada zatrymali aktyvista arhanizacyi Miečysłava Jaskieviča: jaho abvinavacili ŭ bojcy na haradzkim prypynku. Na aktyvista raspačali kryminalnuju spravu za chulihanstva. 5–6 listapada milicyja pačała pravierku dziejnaści Sajuzu palakaŭ pavodle zajavy miascovaha kamitetu ŭ spravach relihijaŭ i nacyjanalnaściaŭ: adbylisia dopyty aktyvistaŭ u Vaŭkavysku, Sapockinie, Indury.
«Novaje žyćcio»
1 listapada nieviadomyja apahanili budynak pratestanckaj carkvy «Novaje žyćcio» , pakinuŭšy abrevijaturu NBP. 2 listapada biełaruskaja filija Nacyjanał-balšavickaj partyi abvierhła svaju datyčnaść da ŭčynku. 4 listapada Prezydyjum Vyšejšaha haspadarčaha sudu skasavaŭ usie papiarednija rašeńni nakont budynku carkvy j pastanaviŭ razhledzieć spravu ad samaha pačatku.
27 kastryčnika
Supracoŭniki KDB naviedali BDU, dzie praviali razmovu z studentam Siarhiejem Karpovičam, siabram «Moładzi BNF».
31 kastryčnika
Stała viadoma, što jašče 23 kastryčnika HA «ZBSB «Baćkaŭščyna» atrymała list ad kamunalnaha pradpryjemstva «Mienskaja spadčyna»: z arhanizacyjaj chočuć skasavać damovu arendy prymusova, praz sud. Miž tym, pavodle pastanovy Saŭminu, pamiaškańnie vydzialałasia abjadnańniu na 25 hadoŭ, i minułyja 13 hadoŭ «Baćkaŭščyna» spraŭna płaciła za arendu.
Palitviazień Alaksandar Kazulin byŭ špitalizavany padčas haładoŭki, ale vypisany z sančastki na ŭłasnuju prośbu. Advakata Ihara Rynkieviča da jaho nie puścili: maŭlaŭ, heta pahoršyć samačućcie viaźnia. Adnak puścili pradstaŭnika ABSE Okie Petersana.
Abjadnańniu veteranaŭ vajny ŭ Afhanistanie, ofis jakoha mieścicca ŭ Žodzinie, admovili ŭ pamiaškańni dla jurydyčnaha adrasu.
Supracoŭniki KDB naviedali Mienski prafesijna-techničny kaledž elektroniki, dzie vyklikali na razmovu aktyvistku «Moładzi BNF» Nastaśsiu Aleksandrovič.
Sajt «Biełdziaržcharčpramu» nie pracavaŭ amal sutki, na im byŭ nadpis «Dostup da sajtu prypynieny ŭ suviazi z adsutnaściu apłaty pracy administratara sajtu za 3 (TRY) miesiacy».
1 listapada
Bieraściejskija sacyjał-demakraty abviaścili haładoŭku salidarnaści z kiraŭnikom partyi Alaksandram Kazulinym. Haładoŭniki majuć trymać jaje pa čarzie. 2 listapada da ich dałučylisia pradstaŭniki Horadni. 3 listapada akcyju padtrymała Volha Maćviajuk z Sacyjalistyčnaj partyi Ŭkrainy.
U aeraporcie «Miensk-2» pry adlocie ŭ Vienu pamiežniki praviali ŭzmocnieny nadhlad pravaabaroncaŭ Aleha Vołčaka i Mirasłava Kobasy, dziela čaho zatrymali vylet samalota.
Haspadarčy sud Miensku pastanaviŭ kanfiskavać častku majomaści HA «Biełaruski Chelsynski kamitet» (kamputar i meblu) na sumu ŭ 225 tys.rub. – u košt štrafaŭ i finansavych zapazyčanaściaŭ. Adnačasna ŭ Viarchoŭnym sudzie znoŭ adkryli inicyjavanuju Minjustam spravu pra zakryćcio BCHK.
2 listapada
Viarchoŭny sud admoviŭsia razhladać skarhu AHP na rašeńnie ŭpravy justycyi Mienabłvykankamu pra likvidacyju partyjnaj supołki ŭ Kleckim rajonie: skarhi pa takich rašeńniach sudu nie padviedamasnyja.
3 listapada
U Mahilovie zatrymali aktyvista PBNF Ryhora Kastusiova, jaki mieŭsia jechać u Kijeŭ na kanferencyju. Jaho źvinavacili ŭ chulihanstvie («mačyŭsia ŭ hramadzkim miescy») dy aryštavali na 3 sutak.
U rečycki adździeł dziaržpradpryjemstva «Biełtechinventaryzacyja» pryjšoŭ list ź mienskaha hałaŭnoha ofisu: z 18 listapada spynić kantrakt z aktyvistam PBNF Valerjem Pucickim.
Pasiedžańnia Viarchoŭnaha sudu ŭ spravie prypynieńnia PKB nie adbyłosia, bo partyja vykanała ŭsie patrabavańni Minjustu. Data novaha pasiedžańnia nie pryznačanaja, ale jano pavinna adbycca da 27 listapada.
Nakład pieršaha numaru niezaležnaj hazety «Naš Mahiloŭ» kanfiskavany milicyjantami: redaktara Andreja Dźvihuna zatrymali, zajaviŭšy, što jon padobny da rabaŭnika.
U Vyšejšym haspadarčym sudzie pačaŭsia razhlad spravy pavodle pazovu časopisu «ARCHE» da Ministerstva justycyi z nahody prypynieńnia vychadu vydańnia. Nastupnaje pasiedžańnie pryznačanaje na 8 listapada.
4 listapada
U Biełaaziorsku zatrymany aktyvist PBNF deputat harsavietu Juraś Hubarevič: jaho abvinavacili ŭ parušeńni praviłaŭ darožnaha ruchu, zavieźli ŭ rajcentar – Biarozu, a praz 9 hadzinaŭ vypuścili biez tłumačeńniaŭ, pa darozie «zhubiŭšy» pašpart.
U Homieli byłoha sudździu Siarhieja Jaraševiča prysudzili da 2 hadoŭ papraŭčych rabotaŭ za zapis u knizie skarhaŭ i prapanovaŭ Rahačoŭskaha sudu: jon paraŭnaŭ sudździaŭ Uładzimiera Sałamiejčuka j Mikałaja Rubisava z sudździami 1937 hodu, što było pryznana abrazaj ich.
U Bieraści zatrymany aktyvist AHP Ściapan Navasialčan, jaki mieŭsia jechać u Kijeŭ na apazycyjnuju kanferencyju: jamu zajavili, što jaho padazrajuć, niby jon źbirajecca pieravozić va Ŭkrainu rečy, zabaronienyja da vyvazu ź Biełarusi.
Dobruskaje DAI zatrymała aŭtamabil aktyvista PKB Valerja Rybčanki, dzie jechali na kanferencyju ŭ Kijeŭ taksama kamunisty Ŭładzimier Siakierka, Śviatłana Michalčanka j Viktar Paŭłaŭ. Milicyjanty zajavili, što na mašynie nieadpaviednyja numary, ale ŭ pastarunku mašynaj nichto nie zajmaŭsia. Apazycyjanery zrabili zapis u knizie skarhaŭ i prapanovaŭ i adpravilisia va Ŭkrainu «na pierakładnych».
U Asipovičach zatrymali aktyvista AHP Uładzimiera Biełachvostava, jaki mieŭsia jechać u Kijeŭ: jaho vinavacili, što moža nielehalna vieźci bojeprypasy ci zbroju. Paśla pravierki, praź niekalki hadzinaŭ, jaho adpuścili z prabačeńniami.
5 listapada
U Niaśvižy padčas rasklejki «BRSMaŭskich» nalepak «Živi viesielej – stuči na druziej» zatrymali moładzievuju aktyvistku Nastu Azarku. Administracyjny sud nad joj pryznačany na 8 listapada.
6 listapada
Niedziaržaŭnaja hazeta «Viciebski kurjer» druhi raz ciaham hodu źmianiła adras, bo joj raz admovili ŭ arendzie.
Svajaki pravaabaroncy Kaciaryny Sadoŭskaj patrabujuć jaje špitalizacyi: 60-hadovaja žančyna za 2 miesiacy da zatrymańnia mieła ankalahičnuju aperacyju.