«Repietycyja Dnia pieramohi»: repartaž

onłajn, dadalisia videa i foty Daraškievič

Tysiača čałaviek sabrałasia na «Repietycyju Dnia pieramohi». Mitynh zaviaršyŭsia supolnym čytańniem «A chto tam idzie» Kupały.

Niaklajeŭ prapanavaŭ apazicyi abjadnacca vakoł patrabavańnia praviadzieńnia svabodnych vybaraŭ biez Łukašenki.

Vynikovy repartaž ź mitynhu na płoščy Svabody:

19.00

Niaklajeŭ i Sańnikaŭ razam vyjšli na scenu i pa čarzie, pa radku pračytali «A chto tam idzie» Kupały. Paśla hetaha razam z demanstrantami jany skandavali «Žyvie Biełaruś».

18.50

Nastupnym słova ŭziaŭ Siarhiej Kalakin, adzin z kiraŭnikoŭ inicyjatyvy pa nazirańni «Svabodnyja vybary». Jon zajaviŭ pra šmatlikija fakty parušeńniaŭ. Ułada, kaža jon, uziała kurs na falsifikacyju vybaraŭ i ŭžo ciapier jasna, što vybary nie svabodnyja.

Jaŭhien Afnahiel, davieranaja asoba Andreja Sańnikava, zaklikaŭ usich byłych «zubroŭ» sabracca na Płoščy 19 śniežnia i «pryśviacić niekalki dzion» budučaj pieramozie.

Viktar Harbačoŭ, pradprymalnik z Barysava i prychilnik Uładzimira Niaklajeva, zaklikaŭ pradprymalnikaŭ pryjechać 19 śniežnia ŭ Minsk.

Znoŭ biare słova śpiavak Źmicier Vajciuškievič: «Nie Sania zastaniecca z nami. Z nami zastanucca bieł-čyrvona-bieły ściah i hierb «Pahonia»!» Ludzi plaskajuć.

18.40

Z emacyjnaj, paetyčnaj pramovaj vystupiŭ Uładzimir Niaklajeŭ. Jon taksama zaklikaje ludziej na Płošču. Kaža, što Płošča stała dla biełarusaŭ svojeasablivym chramam, dzie my vyjaŭlajem svaju vieru.

Niaklajeŭ prapanavaŭ apazicyi abjadnacca vakoł patrabavańnia praviadzieńnia novych vybaraŭ biez Łukašenki. Jon prapanavaŭ i datu takich vybaraŭ: 19 sakavika. Ludzi padchapili skandavańniem: «Novyja vybary biez Łukašenki!».

Takim čynam, mienavita patrabavańnie novych. svabodnych vybaraŭ i moža stać hałoŭnym u časie Płoščy.

Vital Rymašeŭski razmaŭlaje ź ludźmi na Płoščy, razdaje svaje ŭlotki. Jon kaža, što arhanizatary nie dazvolili jamu vystupić.

18.30

Andrej Sańnikaŭ zaklikaŭ vyjści na Płošču 19 śniežnia. Kolkaść prychilnikaŭ apazicyi raście, adznačyŭ jon. Jon zajaviŭ, što ŭ vypadku falsifikacyi vybaraŭ zakliča biełarusaŭ da ahulnanacyjanalnaj zabastoŭki.

18.25

Emacyjna vystupiła Iryna Chalip — jana pramaŭlała pa-biełarusku. 19 śniežnia my musim usie vyjści na Płošču, skazała jana, kab «zrynuć hetuju miarzotnuju fašysckuju ŭładu». Mitynhoŭcy zachoplena vitali hetyja słovy. Chalip pakazała na hadzińnik Ratušy: «Hety hadzińnik adličvaje apošnija dni i hadziny dyktatury».

18.20

Vystupaje Andrej Dźmitryjeŭ, kiraŭnik štaba Niaklajeva. Jon zaklikaje ludziej na Płošču 19 śniežnia.

Dźmitryjeŭ zaklikaŭ minčukoŭ dać žyllo ludziam z rehijonaŭ, jakija pryjeduć na Płošču 19-ha.

Dva dziasiatki aktyvistaŭ Abjadnanaj hramadzianskaj partyi ŭstali z partretami źnikłych miž Ratušaj i vulicaj Lenina. Jany trymajuć taksama vyjavy palitviaźnia Mikałaja Aŭtuchoviča.

18.00

A 18-j hadzinie na płoščy Svabody raspačynajecca sustreča z kandydatami ad apazicyi.

Da tysiačy čałaviek sabrałasia na jaje da momantu adkryćcia, pieradaje z-pad Ratušy karespandent «Našaj Nivy».

Miž Ratušaj i carkvoj Śviatoha Ducha paŭstała impravizavanaja scena ź mietałakanstrukcyj. Sustreču viadzie śpiavak Źmicier Vajciuškievič. Pieršym śpiavaje repier Vinsent. Panuje atmaśfiera nadziei. Nad sabranymi — nadzvyčaj šmat ściahoŭ. Praŭda, niazvykła mała pakul bieł-čyrvona-biełych. Zbolšaha aktyvisty kandydataŭ pryjšli ź jeŭrapiejskimi pałotniščami «Jeŭrapiejskaj Biełarusi» i štandarami «Za Niaklajeva». Jość i bieł-čyrvona-biełyja z zorkaj ściahi Chryścijanskaj Demakratyi.

* * *

Tradycyjnaja akcyja salidarnaści siońnia projdzie ŭ formie sustrečy kandydataŭ na prezidenta z vybarcami. Jana pryznačanaja na płoščy Svabody ŭ Minsku, a 18-j hadzinie. Va ŭlotkach Sańnikava sustreču žartaŭliva nazyvajuć «repietycyjaj Dnia pieramohi».

Pra supolny ŭdzieł u sustrečy zajavili Uładzimier Niaklajeŭ i Andrej Sańnikaŭ.

Pryjedzie i Vital Rymašeŭski, jaki admysłova dziela hetaha vierniecca z Mahilova. A voś Mikoła Statkievič maje sustrečy z vybarcami ŭ Hrodnie.

16 dnia kožnaha miesiaca ŭ Biełarusi i za miažoj pravodziacca Dni salidarnaści ź biełaruskimi palitviaźniami i siemjami źnikłych apanientaŭ Alaksandra Łukašenki. Data źviazanaja z padziejaj 16 vieraśnia 1999 hoda, kali ŭ Minsku źnikli palityk Viktar Hančar i biznesoviec Anatol Krasoŭski.

Kamientary da artykuła