Time nie pasłuchaŭsia ŭłasnych čytačoŭ: Čałaviekam hoda — 2010 staŭ zasnavalnik Facebook, a nie WikiLeaks

Zasnavalnik sacyjalnaj sietki Facebook Mark Cukierbierh pryznany «Čałaviekam hoda — 2010» pa viersii amierykanskaha časopisa Time. Na dumku hałoŭnaha redaktara vydańnia Ryčarda Stendžeła, vynachodstva Cukierbierha źmianiła ŭjaŭleńnie pra dačynieńni ludziej va ŭsim śviecie.

Raniej paviedamlałasia, što padčas anłajn-hałasavańnia, praviedzienaha časopisam Time, čytačy vybrali čałaviekam hoda zasnavalnika skandalnaha sajta WikiLeaks Džulijana Asanža — za jaho prahałasavała 382 020 čytačoŭ. Druhoje miesca zaniaŭ premjer Turcyi Redžep Taip Erdahan (143 383 hałasy), a na treciaj pazicyi apynułasia pop-śpiavačka Łedzi Haha.

Adnak pa tradycyi «Čałavieka hoda» pa viersii Time vybiraje mienavita hałoŭny redaktar hetaha časopisa. Pry hetym Stendžeł adznačyŭ, što Cukierbierh i Asanž źjaŭlajucca «dvuma bakami adnoj maniety»: «Jany abodva vykazvajuć ideju adkrytaści i prazrystaści.

Asanž ličyć śviet poŭnym realnych i ŭjaŭnych vorahaŭ, a Cukierbierh bačyć jaho poŭnym patencyjnych siabroŭ»,

Tradycyja vybirać «čałavieka hoda» pa viersii časopisa Time naličvaje ŭžo bolš za 80 hadoŭ. Zvańnie «čałavieka hoda» redakcyja amierykanskaha vydańnia štohod prysvojvaje čałavieku abo hrupie asobaŭ, jakija zrabili, pa mierkavańni štotydniovika, najbolš hłybokaje ŭździejańnie na suśvietnyja padziei ŭ minułym hodzie.

U 2009 hodzie Time nazvaŭ «čałaviekam hoda» kiraŭnika Fiederalnaj reziervovaj sistemy ZŠA Bena Biernankie, u 2008 hodzie im byŭ pryznany amierykanski lidar Barak Abama, a ŭ 2007 hodzie — Uładzimir Pucin, jaki tady byŭ prezidentam RF.

Kamientary da artykuła