Košt realizacyi prajekta «Minsk-sici» pavialičyŭsia

U suviazi z pavieličeńniem abjomaŭ budaŭnictva žylla i kamiercyjnaj nieruchomaści pavialičyŭsia košt realizacyi prajekta «Minsk-sici». Pra heta paviedamiŭ žurnalistam 16 śniežnia hienieralny dyrektar STAA «Minsk-sici» Siarhiej Kisialoŭ.

Pavodle jaho słoŭ, zaćvierdžana novaja kancepcyja prajekta, jakuju sumiesna raspracavali rasijskija i biełaruskija architektary. Pry hetym Kisialoŭ nie nazvaŭ novuju acenačnuju sumu prajekta, adznačyŭšy, što kančatkova jana stanie viadomaja paśla składańnia detalovaj płaniroŭki i raźlikaŭ pa raschodach na raźvićcio inžyniernaj infrastruktury.

Hienieralny dyrektar STAA «Minsk-sici» nahadaŭ, što pavodle pieršapačatkovaj kancepcyi košt prajekta aceńvaŭsia ŭ 5,7 młrd. dołaraŭ. Prajektavańnie i budaŭnictva viadziecca za košt srodkaŭ, pryciahnutych mižnarodnaj hrupaj kampanij «Itera», i srodkaŭ dolščykaŭ.

Pavodle novaj kancepcyi, abjomy budaŭnictva žylla pavialičvajucca z 1 młn. 270 tys. kv. m da 2 młn. 300 tys. kv. m. «Struktura samoj zabudovy palepšyłasia, buduć stvoranyja kamfortnyja zialonyja i piešachodnyja zony, błok škoły z azdaraŭlenčym kompleksam, jakim zmohuć skarystacca nie tolki školniki, ale i žychary rajona», — paviedamiŭ Kisialoŭ.

Pavodle jaho słoŭ, taksama budzie stvorany dziełavy centr pobač sa stancyjaj mietro «Minsk-sici». «My budziem budavać nie prosta dziełavuju zonu, a zrobim tak, kab heta było zručna dla žycharoŭ. Tak, budzie pabudavany vialiki handlova-zabaŭlalny centr na 200 tys. kv. m. Akramia hetaha, pryniata rašeńnie, što mietro ŭ rajonie „Minsk-sici“ vyjdzie na pavierchniu i źviaža ŭsie transpartnyja šlachi», — raskazaŭ Kisialoŭ. Jon taksama paviedamiŭ, što ŭ rajonie buduć pabudavanyja balnica, palikliniki, mahaziny krokavaj dastupnaści, haścinicy, vialiki łahistyčny centr z mahistrallu da MKAD.

Pavodle infarmacyi Kisialova, ciapier viadziecca budaŭnictva pieršaha žyłoha kvartała (usiaho płanujecca pabudavać dzieviać kvartałaŭ). U stadyi budaŭnictva 57 tys. kv. m žylla. Z 625 kvater pradadziena 170. Košt kvater składaje ad 900 da 1.150 dołaraŭ za kv. m. 15% kvater budujecca dla tych, chto maje patrebu ŭ palapšeńni žyllovych umoŭ.

Pieršyja čatyry vyšynnyja damy «Minsk-sici» buduć zdadzienyja vosieńniu 2011 hoda. Usiaho na terytoryi 318 hiektaraŭ u hetym rajonie biełaruskaj stalicy płanujecca za 12 hadoŭ (da 2022 hoda) uźvieści bolš za 3 młn. kv. m žyłoj i kamiercyjnaj nieruchomaści.

Kamientary da artykuła